ایجنسیز
سرینگر؍۲۹؍اپریل
جموں و کشمیر حکومت نے عوامی ٹرانسپورٹ کے مختلف زمروں کے کرایوں میں۱۸فیصد اضافے کی منظوری دے دی ہے اور اس سلسلے میں باقاعدہ نوٹیفکیشن جاری کر دیا گیا ہے۔
تفصیلات کے مطابق ٹرانسپورٹ محکمہ نے سول سیکریٹریٹ سے جاری نوٹیفکیشن میں ٹرانسپورٹ کمشنر جموں و کشمیر کو ہدایت دی ہے کہ وہ اسٹیج کیریج بسوں، ٹیکسیوں، میکسی کیبز اور آٹو رکشاؤں سمیت مختلف گاڑیوں کے لیے نئے زیادہ سے زیادہ قابلِ وصول کرایے مقرر کریں۔
نوٹیفکیشن کے مطابق نیا کرایہ ڈھانچہ۱۹مارچ۲۰۲۱کے ایس آر او۹۷ کے تحت پہلے سے طے شدہ نرخوں کے علاوہ نافذ ہوگا۔ اس میں بڑی بسیں، منی بسیں، کنٹریکٹ کیریج ٹیکسیاں جیسے سُمو، بولیرو، ٹیمپو ٹریولر، اور درمیانی و اعلیٰ درجے کی سیاحتی گاڑیاں جیسے اسکارپیو، زائیلو، انووا اور فورچیونر شامل ہیں۔
مزید کہا گیا ہے کہ اسٹیج کیریج کے طور پر چلنے والے آٹو رکشہ اور ٹاٹا میجک گاڑیوں کے کرایوں میں بھی۱۸ فیصد اضافہ ہوگا۔
دریں اثنا حکومت نے الیکٹرک گاڑیوں کے لیے الگ سے کرایہ مقرر کیا ہے، جس کے تحت ای رکشہ۱۵ روپے فی کلومیٹر اور ای آٹو پہلے کلومیٹر کے لیے۲۵ روپے جبکہ اس کے بعد ہر کلومیٹر کے لیے۲۰روپے وصول کرے گا۔
یہ حکم موٹر وہیکلز ایکٹ۱۹۸۸کی دفعہ۶۷ کے تحت جاری کیا گیا ہے، جس کے ذریعے سابقہ نوٹیفکیشن میں جزوی ترمیم کی گئی ہے، اور اس کا اطلاق مجاز اتھارٹی کی ہدایات کے مطابق ہوگا۔
