فیفا ورلڈکپ 2026: متحدہ عرب امارات کے تین میچ آفیشلز کا تاریخی انتخاب

دبئی، 10 اپریل( یو این آئی) فیفا نے رواں برس امریکہ، کینیڈا اور میکسیکو میں ہونے والے ورلڈ کپ کے لیے یو اے ای سے تعلق رکھنے والے تین میچ آفیشلز کو منتخب کر لیا ہے۔عالمی کپ میں اماراتی پرچم کی نمائندگی کرنے والے تینوں ماہرین اپنے شعبے میں نمایاں مقام رکھتے ہیں۔
عمر محمد العلی: بطور ریفری (یفری)،محمد الحمادی: بطور اسسٹنٹ ریفری اورمحمد عبید خادم: بطور ویڈیو میچ آفیشل
فیفا نے اس ورلڈ کپ کے لیے مجموعی طور پر 52 ریفریز، 88 اسسٹنٹ ریفریز اور 30 ویڈیو آفیشلز کا انتخاب کیا ہے۔ 11 جون سے شروع ہونے والے اس ٹورنامنٹ میں 48 ٹیمیں حصہ لیں گی اور مجموعی طور پر 104 میچز کھیلے جائیں گے، جو کہ ورلڈ کپ کی تاریخ کا سب سے بڑا فارمیٹ ہے۔فیفا ریفری کمیٹی کے چیئرمین پیئر لوئیگی کولینا نے انتخاب کے حوالے سے بتایا کہ تمام آفیشلز کا انتخاب "کوالٹی فرسٹ” کے اصول کے تحت کیا گیا ہے۔
گزشتہ تین سالوں سے ان کی کارکردگی پر کڑی نظر رکھی جا رہی تھی۔منتخب آفیشلز 31 مئی کو میامی پہنچیں گے، جہاں ان کی جسمانی اور ذہنی فٹنس کا حتمی جائزہ لیا جائے گا۔اماراتی آفیشلز کی عالمی کپ میں نمائندگی کی تاریخ کافی پرانی ہے۔علی بوجسیم یو اے ای کے پہلے ریفری تھے جنہوں نے 1994، 1998 اور 2002 کے مسلسل تین ورلڈ کپ مقابلوں میں ریفرینگ کے فرائض انجام دیے۔ورلڈ کپ 2022 قطر میں ہونے والے گزشتہ ورلڈ کپ میں بھی محمد عبداللہ حسن کی سربراہی میں ایک مکمل اماراتی ٹیم نے فرانس اور پیرو کے میچ میں بہترین ریفرینگ کی تھی۔