خلاف ورزی کرنے والوں کیخلاف سخت کارروائی اور نگرانی کی ہدایت
ڈی آئی پی آر
جموں؍۹؍اپریل
چیف سیکریٹری اٹل ڈلو نے آج متعلقہ انتظامی سیکریٹریز، ڈویژنل کمشنرز اور ضلعی انتظامیہ کے ساتھ ایک اعلیٰ سطحی اجلاس کی صدارت کی، جس میں مغربی ایشیا کی بدلتی ہوئی جغرافیائی و سیاسی صورتحال کے پیش نظر جموں و کشمیر میں ضروری اشیاء کی دستیابی اور تقسیم کا جائزہ لیا گیا تاکہ کسی بھی ممکنہ سپلائی خلل کے خلاف مناسب ذخیرہ یقینی بنایا جا سکے۔
اجلاس میں پیش کیے گئے اعداد و شمار کے مطابق یونین ٹیریٹری میں اس وقت پیٹرول، ہائی اسپیڈ ڈیزل(ایچ ایس ڈی ) اور ایل پی جی کے ذخائر مستحکم ہیں، جبکہ مزید سپلائی راستے میں ہے جس سے ذخائر مزید مضبوط ہوں گے۔
چیف سیکریٹری نے ہیلپ لائنز کے ذریعے موصول ہونے والی عوامی شکایات اور ان کے ازالے کا بھی جائزہ لیا اور آئل مارکیٹنگ کمپنیوں اور ضلعی انتظامیہ کو ہدایت دی کہ آگاہی مہمات کو تیز کیا جائے اور ذخیرہ اندوزی، من مانی قیمتوں اور بلیک مارکیٹنگ کی روک تھام کے لیے سخت معائنہ کیا جائے۔ انہوں نے کھاد اور غذائی اجناس سمیت ضروری اشیاء کی منصفانہ فراہمی کو یقینی بنانے پر زور دیا۔
ڈلو نے دونوں ڈویژنوں میں تجارتی اور صنعتی شعبوں کو۷۰فیصد سپلائی یقینی بنانے اور تمام صارفین کی ای-کے وائی سی مکمل کرنے کی ہدایت بھی دی۔
کمشنر سیکریٹری محکمہ خوراک، شہری رسدات و امور صارفین سوربھ بھگت نے بتایا کہ پورے یو ٹی میں بلا رکاوٹ سپلائی کو یقینی بنانے کے لیے مناسب اقدامات کیے گئے ہیں، جن میں مہاجرین اور مزدوروں کیلئے۵ کلوگرام ایل پی جی سلنڈرز کی دستیابی بھی شامل ہے۔
جموں ڈویژن کے حوالے سے ڈویژنل کمشنر رمیش کمار نے بتایا کہ یہاں۷۳۲۵ کلو لیٹر پیٹرول اور۲۷ہزار۲۴۱ کلو لیٹر ڈیزل دستیاب ہے، جبکہ سپیریئر کیروسین آئل(ایس کے او) کے لیے۴۹ دن اور ایوی ایشن ٹربائن فیول کے لیے۱۲ دن کا ذخیرہ موجود ہے۔ اُدھمپور، کٹھوعہ اور ڈوڈہ میں مناسب ذخائر موجود ہیں، جبکہ کشتواڑ اور رام بن میں۳تا۴دن کے ذخیرے کو برقرار رکھنے کے لیے مسلسل نگرانی کی جا رہی ہے۔انہوں نے مزید کہا کہ جموں ڈویژن میں اس وقت۴۷ہزار۲۹۶؍ایل پی جی سلنڈرز موجود ہیں جبکہ گزشتہ۱۰ دنوں میں۷ہزار۷۶۹ سلنڈرز صارفین کو فراہم کیے گئے۔ چیف سیکریٹری نے سپلائی اور طلب کے درمیان فرق کو ختم کرنے کی ہدایت دی۔
کشمیر ڈویژن کے بارے میں ڈویژنل کمشنر انشُل گرگ نے بتایا کہ یہاں۷۷۲۱ کلو لیٹر پیٹرول اور۱۳ہزار۴۸۷ کلو لیٹر ڈیزل موجود ہے، جو ٹرانزٹ سپلائی کے ساتھ ملا کر بالترتیب۱۹ دن اور۲۱دن کا ذخیرہ فراہم کرتے ہیں، جبکہ ایل پی جی کے۴۰۷۲ میٹرک ٹن ذخائر سے۱۶دن کی ضروریات پوری ہو سکتی ہیں۔
انہوں نے بتایا کہ سرینگر، اننت ناگ اور پلوامہ سمیت اضلاع میں سپلائی مستحکم ہے اور اوسطاً۵دن کا مقامی ذخیرہ موجود ہے۔ ڈویژن میں مجموعی طور پر ایک لاکھ ۴۸ہزار۷۶۹ ؍ایل پی جی سلنڈرز دستیاب ہیں، جبکہ یکم اپریل سے۸؍اپریل تک۴۹۸۷ سلنڈرز تقسیم کیے گئے۔
اجلاس کے دوران ڈپٹی کمشنرز نے اپنے اضلاع میں ایل پی جی، ایندھن اور غذائی اجناس کی دستیابی، تقسیم، کارروائیوں اور شکایات کے ازالے کی تفصیلات پیش کیں۔
چیف سیکریٹری نے ضلعی انتظامیہ کو ہدایت دی کہ بین الاقوامی حالات کے بہانے ذخیرہ اندوزی یا من مانی قیمتوں کو ہرگز برداشت نہ کیا جائے اور خاص طور پر دور دراز علاقوں میں ضروری اشیاء کی بلا رکاوٹ فراہمی کو یقینی بنایا جائے۔
انہوں نے عوام کو یقین دلایا کہ جموں و کشمیر میں مناسب ذخائر موجود ہیں اور گھبرانے کی کوئی ضرورت نہیں کیونکہ موجودہ سپلائی اور راستے میں موجود ذخائر معمول کی صورتحال برقرار رکھنے کے لیے کافی ہیں۔
