نئی دہلی، 22 مارچ (یو این آئی ) انڈین پریمیئر لیگ (آئی پی ایل) کے اگلے سیزن کے لیے راجستھان رائلز نے سری لنکا کے تجربہ کار آل راؤنڈر داسن شناکا کو بطور متبادل کھلاڑی سائن کرنے کا فیصلہ کر لیا ہے۔ شناکا انگلینڈ کے اسٹار آل راؤنڈر سیم کرن کی جگہ لیں گے، جو انجری کے باعث ٹورنامنٹ سے باہر ہو چکے ہیں۔
راجستھان رائلز کے ایک اعلیٰ عہدیدار نے ‘کرک بز’ سے گفتگو کرتے ہوئے اس خبر کی تصدیق کی ہے۔ ان کا کہنا تھا،”جی ہاں، ہم شناکا کو سائن کرنے کے بہت قریب ہیں اور کچھ رسمی کارروائیاں باقی ہیں۔ انہیں سری لنکا کرکٹ کے ساتھ ضروری کاغذی کارروائی مکمل کرنی ہے جس کے بعد وہ ٹیم میں شامل ہو جائیں گے۔
داسن شناکا گزشتہ دسمبر میں آئی پی ایل کی منی آکشن میں فروخت نہیں ہو سکے تھے، جس کے بعد انہوں نے پاکستان سپر لیگ ( پی ایس ایل) کا رخ کیا جہاں انہیں لاہور قلندرز نے 75 لاکھ پاکستانی روپے میں خریدا تھا۔ تاہم، آئی پی ایل سے پیشکش ملنے پر انہوں نے پی ایس ایل چھوڑنے کا فیصلہ کیا ہے۔
قابلِ ذکر بات یہ ہے کہ شناکا اس سیزن میں پی ایس ایل سے آئی پی ایل میں منتقل ہونے والے دوسرے کھلاڑی ہیں۔ اس سے قبل زمبابوے کے بلیسنگ مزاربانی نے بھی اسلام آباد یونائیٹڈ کے ساتھ اپنا معاہدہ ختم کر کے کولکتہ نائٹ رائیڈرز میں شمولیت اختیار کی تھی۔
