آئی پی ایل 2026: میتھیو ہیڈن گجرات ٹائٹنز کے بیٹنگ کوچ مقرر

احمد آباد،10 مارچ (یو این آئی ) انڈین پریمیئر لیگ (آئی پی ایل) کی فرنچائز گجرات ٹائٹنز نے منگل کے روز سابق آسٹریلیائی اوپنر میتھیو ہیڈن کو آئندہ سیزن کے لیے اپنا بیٹنگ کوچ مقرر کرنے کا باضابطہ اعلان کیا ہے۔ فرنچائز کو امید ہے کہ ہیڈن کی شمولیت سے ٹیم کا بیٹنگ یونٹ مزید مضبوط ہوگا اور نوجوان کھلاڑیوں کو ان کے تجربے سے سیکھنے کا موقع ملے گا۔
میتھیو ہیڈن، جنہیں کرکٹ کی دنیا میں aydosکے نام سے بھی جانا جاتا ہے، ایک وسیع تجربے کے حامل کھلاڑی رہے ہیں۔ انہوں نے آسٹریلیا کی نمائندگی کرتے ہوئے 103 ٹیسٹ، 161 ون ڈے اور 9 ٹی ٹوئنٹی میچوں میں مجموعی طور پر 15,066 رنز اسکور کیے۔
وہ دو بار آئی سی سی ورلڈ کپ جیتنے والی آسٹریلیائی ٹیم کا حصہ رہے ہیں۔ 2007 کے ورلڈ کپ میں وہ 659 رنز کے ساتھ ٹاپ اسکورر تھے، جس میں صرف 66 گیندوں پر اس وقت کی تیز ترین سنچری بھی شامل تھی۔ ہیڈن نے آئی پی ایل کے تین سیزنز میں 32 میچز کھیل کر 1,107 رنز بنائے اور 2010 میں چنئی سپر کنگز کے ساتھ ٹائٹل بھی جیتا۔
فرنچائز کے مطابق، کپتان شبھمن گل کی قیادت اور میتھیو ہیڈن کی رہنمائی میں ٹیم کا واحد مقصد 2026 کے سیزن میں اپنا دوسرا آئی پی ایل خطاب جیتنا ہے۔ ہیڈن کی تقرری ٹیم کے بیک روم اسٹاف اور مجموعی حکمت عملی کو مزید مستحکم کرے گی۔