سرینگر/۱۷مارچ
کشمیری صحافی اور ’کشمیر والا‘آن لائن نیوز پورٹل کے ایڈیٹر فہد شاہ پر عائد پبلک سیفٹی ایکٹ (پی ایس اے ) کے ڈوزئیر میں کہا گیا ہے کہ ان کے نیوز پورٹل میں اچھی حکمرانی اور حکومت ہند کے مثبت اپروچ کے متعلق خبریں بمشکل ہی شائع ہوتی ہیں۔
ضلع مجسٹریٹ سرینگر کی طرف سے جاری اس ڈوزئیر میں موصوف صحافی پر صحافت کی آڑ میں ملک دشمن عنصر ہونے کا الزام لگایا گیا ہے ۔
ایس ایس پی سرینگر نے ڈوزئیر میں کہا ہے’’کشمیر والا آن لائن نیوز پورٹل کا سربراہ ہونے کے ناطے آپ لگاتار ایسی اسٹوریز کی تشہیرکرتے ہو جو قومی مفادات و تحفظ کے خلاف ہوتی ہیں‘‘۔
ڈوزئیر میں کہا گیا’’آپ فہد شاہ علیحدگی پسند پروپیگنڈا کے موافق ایک مخصوص بیانیے کی تشہیر کرتے ہو‘‘۔
مذکورہ پی ایس اے ڈوزئیر میں کہا گیا’’گذشتہ دو برسوں کے دوران آپ نے ملک مخالف جذبات کی تشہیر کیلئے ایک مخصوص طریقہ اپنایا ہوا ہے‘ بعض خبریں انتہائی اشتعال انگیز ہوتی ہیں‘‘۔
ڈوزئیر میں کہا گیا’’ہر شہری کو احتجاج درج کرنے کا حق ہے لیکن مذکورہ اسٹوریز سے ظاہر ہوتا ہے کہ سڑکوں پر احتجاج کرنے اور تشدد کی آئیڈیالوجی کو اکسانے کی کوشش کی گئی ہے ‘‘۔
فہدشاہ سے ڈوزئیر میں کہا گیا’’آپ پتھر بازوں اور تشدد کے دوسرے عناصر کو قانونی جواز بخشتے ہو‘‘۔
ڈوزئیر میں کہا گیا’’آپ کا طریقہ کار یہ ہے کہ ہر ماہ ایک یا دو ایسی خبریں اپنے پورٹل پر کرتے ہو جن کی بنیاد متاثر ہونے کے بیانیے پر ہوتی ہے جس سے ملک مخالف جذبات کی تشہیر ہوتی ہے ، پتھر باز، ملی ٹنٹ گلوریفائی ہوجاتے ہیں اور حلاحیدگی پسندی اور تشدد کو جواز ملتا ہے ‘‘۔
ڈوزئیر میں فہد شاہ کو صحافت کی آڑ میں ملک دشمن عنصر قرار دیتے ہوئے کہا گیا’’آپ صحافت کی آڑ میں ملک دشمن عنصر ہو اور آپ کو ہمیشہ پرنٹ اور لیکٹرانک میڈیا کے ذریعے سادہ لوح عوام کو حکومت ہند اور حکومت جموں کشمیر کے خلاف اکساتے ہوئے پایا گیا‘‘۔
فہد شاہ کے ٹویٹس کے متعلق ڈوزئیر میں کہا گیا’’آپ یونین آف انڈیا کے خلاف نفرت سے بھرے ہوئے ہواور آپ کی سوشل میڈیا ٹائم لائن کو دیکھ کر عام شخص بھی آپ کی نیت کے بارے میں فیصلہ کرسکتا ہے ‘‘۔
ڈوزئیر میں مزید کہا گیا’’آپ سدھرنے میں ناکام ہوگئے بلکہ اپنی تخریبی سرگرمیوں کو جاری رکھے ہوئے ہو اور آپ کا باہر رہنا جموں وکشمیر یونین ٹریٹری کے لئے خطرہ ہے ‘‘۔
قابل ذکر ہے کہ فہد شاہ کو چار فروری کو گرفتار کیا گیا تھا اور پیر کے روز ان پر پی ایس اے عائد کر دیا گیا۔
