رنجی ٹرافی فائنل:جموں و کشمیر کا اسکور بورڈ پر تسلط،527 رنز کا پہاڑ جیسا مجموعہ ترتیب

ہبلی (کرناٹک)، 25 فروری (یواین آئی ) شبھم سنگھ پنڈیر (121) کی شاندار سنچری،یاور حسین 88 رن ، کپتان پارس ڈوگرا (70)، کنہیا ودھاون (70)، عبدالصمد (61) اور ساحل لوتھرا (ناٹ آؤٹ 57) کی نصف سنچریوں کی بدولت جموں و کشمیر نے کرناٹک کے خلاف رنجی ٹرافی فائنل کے دوسرے دن اپنی گرفت مضبوط کر لی ہے۔ بدھ کو کھیل کے اختتام تک جموں و کشمیر نے 6 وکٹوں کے نقصان پر 527 رنز کا پہاڑ جیسا مجموعہ ترتیب دے دیا ہے۔
گزشتہ دن کے سنچری میکر شبھم سنگھ پنڈیر نے اپنی اننگز کو 121 رنز تک پہنچایا۔ انہوں نے 247 گیندوں کا سامنا کرتے ہوئے 12 چوکے اور دو چھکے لگائے۔ انہیں ودیا دھر پاٹل نے آؤٹ کیا۔
تجربہ کار پارس ڈوگرا نے 70 رنز کی ذمہ دارانہ اننگز کھیلی، تاہم وہ شریاس گوپال کی گیند پر بولڈ ہو گئے۔ عبدالصمد نے 61 رنز بنا کر مڈل اوورز میں اسکور کی رفتار کو برقرار رکھا، جبکہ کنہیا ودھاون نے بھی 70 رنز کا اہم حصہ ڈالا۔دوسرے دن کا کھیل خراب روشنی کے سبب روکنے کے وقت جَمّو و کشمير نے 156 اوورز میں 6 وکٹ پر 527 رنز بنا لیے تھے۔ ساحل لوتھرا (ناٹ آؤٹ 57) اور عابد مشتاق (ناٹ آؤٹ 30) کریز پر موجود تھے۔ ٹیم کا مقصد اپنی پہلی اننگز کو بڑے اسکور تک پہنچانا ہے۔کَرناٹک کی جانب سے پرسیدھ کرشنا نے تین وکٹیں حاصل کیں، جبکہ ویدیا دھر پاٹل، شریاس گوپال اور شِکھر شیٹی نے ایک ایک کھلاڑی کو آؤٹ کیا۔