دبئی، 25 فروری (یواین آئی ) انٹرنیشنل کرکٹ کونسل (آئی سی سی) کی جانب سے بدھ کو جاری کردہ تازہ ترین ٹی 20 رینکنگ میں ہندوستانی کھلاڑیوں کا غلبہ برقرار ہے۔ ہندوستان اور سری لنکا کی میزبانی میں جاری ورلڈ کپ کے دوران، خراب فارم کے باوجود ابھیشیک شرما بیٹنگ اور ورون چکرورتی بولنگ رینکنگ میں نمبر ون پوزیشن پر موجود ہیں۔
ابھیشیک شرما ٹاپ پوزیشن پر برقرار ہیں۔صاحبزادہ فرحان (پاکستان) دو درجے بہتری کے ساتھ تیسرے نمبر پر پہنچ گئے، جو ان کے کیریئر کی بہترین ریٹنگ ہے۔فل سالٹ (انگلینڈ) دوسرے نمبر پر براجمان ہیں۔ پاکستان کے صائم ایوب کو پیچھے چھوڑتے ہوئےسکندر رضا نے آل راؤنڈر رینکنگ میں نمبر ون کی پوزیشن حاصل کی،افغانستان کے تجربہ کارکھلاڑی محمد نبی تین درجے اوپر آ کر آٹھویں نمبر پر ہیں۔جنوبی افریقہ کے کاربن بوش نے تین وکٹیں لینے اور ہندوستان کے خلاف صرف 12 رنز دے کر دو وکٹیں لینے کے بعد 21 درجے اوپر ہو کر تیسرے نمبر پر جگہ بنائی۔
انٹرنیشنل کرکٹ کونسل (آئی سی سی) نے ٹی ٹوئنٹی کرکٹ کی نئی پلیئرز رینکنگ جاری کر دی ہے، جس نے عالمی کرکٹ میں کھلاڑیوں کے درمیان جاری سخت مقابلے کو مزید دلچسپ بنا دیا ہے۔ اس بار رینکنگ کا مرکزِ نگاہ آل راؤنڈرز کی فہرست رہی، جہاں زمبابوے کے تجربہ کار کھلاڑی نے پاکستانی نوجوان اسٹار کو ٹاپ پوزیشن سے محروم کر دیا ہے۔
زمبابوے کے سکندر رضا نے اپنی حالیہ شاندار کارکردگی کی بدولت ایک بار پھر دنیا کے بہترین ٹی ٹوئنٹی آل راؤنڈر ہونے کا اعزاز حاصل کر لیا ہے۔ دوسری جانب، پاکستان کے ابھرتے ہوئے آل راؤنڈر صائم ایوب، جو گزشتہ رینکنگ میں نمبر ون پوزیشن پر براجمان تھے، ایک درجہ تنزلی کے بعد دوسرے نمبر پر آ گئے ہیں۔
