نیوزی لینڈ نے ہندوستان کو 50 رن سے شکست دے دی

وشاکھا پٹنم،29 جنوری (یواین آئی) ٹِم سائفرٹ (64)، ڈیون کانوے (44) اور ڈیرل مچل (ناٹ آؤٹ 39) کی شاندار بلے بازی کے بعد کپتان مچل سینٹنر (تین وکٹ) کی قیادت میں گیندبازوں کی عمدہ گیندبازی کی بدولت نیوزی لینڈ نے بدھ کے روز چوتھے ٹی-20 مقابلے میں ہندوستان کو 50 رن سے ہرا دیا۔
216 رن کے ہدف کے تعاقب میں اتری ہندوستانی ٹیم کی شروعات خراب رہی اور اس نے 9 رن کے اسکور پر دو وکٹ گنوا دیے۔ ابھیشیک شرما (صفر) اور سوریہ کمار یادو (8) رن بنا کر آؤٹ ہوئے۔ اس کے بعد سنجو سیمسن نے رِنکو سنگھ کے ساتھ تیسرے وکٹ کے لیے 46 رن کی شراکت قائم کی۔ ساتویں اوور میں مچل سینٹنر نے سنجو سیمسن کو 16 گیندوں میں 24 رن پر آؤٹ کر کے ہندوستان کو تیسرا جھٹکا دیا۔ ہاردک پانڈیا (2) کو بھی سینٹنر نے پویلین بھیجا۔ رِنکو سنگھ 30 گیندوں میں 39 رن بنا کر پانچویں وکٹ کے طور پر آؤٹ ہوئے۔
اس کے بعد شِوَم دوبے نے ہرشِت رانا کے ساتھ چھٹے وکٹ کے لیے 63 رن جوڑ کر امید جگائی، لیکن 15ویں اوور کی آخری گیند پر میٹ ہینری نے شِوَم دوبے کو رن آؤٹ کر دیا۔ شِوَم دوبے نے 23 گیندوں میں سات چھکے اور تین چوکے لگا کر 65 رن کی جارحانہ اننگز کھیلی اور ہندوستان کی جانب سے تیسری تیز ترین ٹی-20 نصف سنچری مکمل کی۔ اگلے ہی اوور میں ہرشِت رانا 9 رن بنا کر آؤٹ ہوئے۔ ارشدیپ سنگھ (صفر) اور جسپریت بمراہ (4) رن بنا کر آؤٹ ہوئے۔ 19ویں اوور کی چوتھی گیند پر جیکب ڈفی نے کلدیپ یادو (1) کو آؤٹ کر کے 165 کے اسکور پر ہندوستانی اننگز کا خاتمہ کر دیا اور اپنی ٹیم کو 50 رن سے فتح دلائی۔
نیوزی لینڈ کی جانب سے مچل سینٹنر نے تین وکٹ حاصل کیے، جبکہ جیکب ڈفی اور ایش سوڈھی کو دو دو وکٹ ملے۔ میٹ ہینری اور زیکری فوکس نے ایک ایک بلے باز کو آؤٹ کیا۔
اس سے قبل ہندوستان نے ٹاس جیت کر پہلے گیندبازی کا فیصلہ کیا تھا۔ نیوزی لینڈ کی بلے بازی میں ٹِم سائفرٹ اور ڈیون کانوے کی اوپننگ جوڑی نے پہلے وکٹ کے لیے 100 رن جوڑے۔ نویں اوور میں کلدیپ یادو نے ڈیون کانوے کو آؤٹ کر کے اس شراکت کو توڑا۔ کانوے نے 23 گیندوں میں چار چوکے اور تین چھکے لگا کر 44 رن بنائے۔ اگلے اوور میں جسپریت بمراہ نے رچن رویندرا (2) کو اپنی ہی گیند پر کیچ آؤٹ کیا۔ 13ویں اوور میں ارشدیپ سنگھ نے ٹِم سائفرٹ کو آؤٹ کر کے رفتار کم کی؛ سائفرٹ نے 36 گیندوں میں سات چوکے اور تین چھکے لگا کر 62 رن بنائے۔ بعد ازاں کلدیپ نے گلین فلپس (24) کو آؤٹ کیا، مارک چیپمین (9) کو روی بشنوئی نے پویلین بھیجا۔ مچل سینٹنر (11) اور زیکری فوکس 13 رن بنا کر آؤٹ ہوئے۔ نیوزی لینڈ نے مقررہ 20 اوور میں سات وکٹ کے نقصان پر 215 رن بنائے۔ ڈیرل مچل نے 18 گیندوں میں دو چوکے اور تین چھکے لگا کر ناٹ آؤٹ 39 رن بنائے۔
ہندوستان کی جانب سے گیندبازی میں کلدیپ یادو اور ارشدیپ سنگھ نے دو دو وکٹ حاصل کیں، جبکہ جسپریت بمراہ اور روی بشنوئی نے ایک ایک بلے باز کو آؤٹ کیا۔