شاہین شاہ آفریدی کی فٹنس میں نمایاں بہتری، نیٹ پر بولنگ کا آغاز کر دیا

لاہور،20 جنوری (یواین آئی ) پاکستان کے اسٹار فاسٹ بولر شاہین شاہ آفریدی نے انجری کے طویل وقفے کے بعد باقاعدہ بولنگ کا آغاز کر دیا ہے۔ لاہور کے ایل سی سی اے گراؤنڈ میں نیٹ پریکٹس شروع کرنے والے شاہین کی آسٹریلیا کے خلاف سیریز میں شرکت اب ان کے آئندہ چند روز میں ہونے والے فٹنس ٹیسٹ سے مشروط ہے۔
ذرائع کے مطابق، شاہین شاہ آفریدی گزشتہ روز لاہور پہنچے تھے جہاں انہوں نے اپنی ری ہیب (بحالی) کی سرگرمیوں کو تیز کر دیا ہے۔ آج انہوں نے ایل سی سی اے گراؤنڈ میں باقاعدہ بولنگ کا آغاز کیا، جسے ان کی مکمل صحتیابی کی جانب ایک مثبت قدم قرار دیا جا رہا ہے۔
پاکستانی ٹیم کے پیسر کی آسٹریلیا کے خلاف آئندہ سیریز میں شرکت کا حتمی فیصلہ ان کی جسمانی فٹنس سے مشروط کیا گیا ہے۔ اس حوالے سے ذرائع کا کہنا ہے کہ شاہین کا باقاعدہ فٹنس ٹیسٹ آئندہ ایک دو روز میں لیا جائے گا۔ٹیسٹ کے نتائج تسلی بخش ہونے کی صورت میں ہی انہیں دورہ آسٹریلیا کے لیے گرین سگنل دیا جائے گا۔
ورلڈ کپ کے پیشِ نظر شاہین شاہ آفریدی اور ٹیم مینجمنٹ دونوں ہی کسی قسم کی جلد بازی سے گریز کر رہے ہیں۔ شاہین کا موقف ہے کہ وہ سو فیصد فٹ ہونے کے بعد ہی انٹرنیشنل کرکٹ میں واپسی کریں گے تاکہ مستقبل میں کسی بڑی انجری سے بچا جا سکے۔ پی سی بی کا طبی عملہ اور ٹیم مینجمنٹ بھی ان کی صحت کے معاملے میں "انتظار کرو اور دیکھو” کی محتاط پالیسی پر عمل پیرا ہے۔