آسٹریلیا کا دورہ پاکستان: ٹی ٹوئنٹی سیریز کے لیے 17 رکنی ٹیم کا اعلان، مچل مارش کپتان مقرر

لاہور،19 جنوری (یو این آئی ) کرکٹ آسٹریلیا نے رواں ماہ کے آخر میں پاکستان کے خلاف شیڈول تین ٹی ٹوئنٹی میچوں کی سیریز کے لیے اپنی 17 رکنی مضبوط ٹیم کا اعلان کر دیا ہے۔ فروری میں ہونے والے ٹی ٹوئنٹی ورلڈ کپ 2026 کی تیاریوں کے سلسلے میں یہ سیریز دونوں ٹیموں کے لیے انتہائی اہمیت کی حامل ہے۔
تجربہ کار آل راؤنڈر مچل مارش ٹیم کی قیادت کریں گے۔ اسکواڈ میں جہاں ٹریوس ہیڈ، ایڈم زیمپا اور مارکس اسٹوئنس جیسے سینئر کھلاڑی شامل ہیں، وہیں بگ بیش لیگ (BBL) میں شاندار کارکردگی دکھانے والے ماہلی بیئرڈمین اور جیک ایڈورڈز کو پہلی بار آسٹریلیائی ٹیم میں شامل کیا گیا ہے۔ اس کے علاوہ میتھیو رینشا کے بھی اس سیریز میں ٹی ٹوئنٹی ڈیبیو کا قوی امکان ہے۔
ورلڈ کپ کو مدنظر رکھتے ہوئے آسٹریلیائی سلیکٹرز نے چند اہم کھلاڑیوں کو آرام دینے کا فیصلہ کیا ہے۔
پیٹ کمنز، جوش ہیزل ووڈ اور ٹم ڈیوڈ کو مکمل فٹنس حاصل کرنے کے لیے وقت دیا گیا ہے۔
گلین میکسویل اور نیتھن ایلس کو ورک لوڈ کے تحت آرام دیا گیا ہے؛ یہ تمام کھلاڑی براہِ راست سری لنکا میں ٹیم کو جوائن کریں گے۔