سرفراز خان نے لسٹ اے کرکٹ میں تیز ترین نصف سنچری مکمل کی

جے پور، 08 جنوری (یو این آئی) سرفراز خان نے وجے ہزارے ٹرافی کے ساتویں راؤنڈ میں پنجاب کے خلاف لسٹ اے کرکٹ میں ہندوستان کی جانب سے تیز ترین نصف سنچری بنا کر نیا ریکارڈ قائم کر دیا۔ جے پور کے جے پوریہ ودیالیہ گراؤنڈ پر 217 رن کے ہدف کے تعاقب میں مشیر خان اور انگکرش رگھوونشی نے 8.2 اوور میں 57 رن کی شراکت قائم کر کے ممبئی کو مضبوط آغاز فراہم کیا۔
اپنے بھائی کے آؤٹ ہونے کے بعد بلے بازی کے لیے اترے سرفراز خان نے آتے ہی اسپن گیندبازوں پر بھرپور حملہ کیا۔ انہوں نے پنجاب کے کپتان ابھیشیک شرما کے ایک ہی اوور میں تین چھکے اور تین چوکے لگائے، جبکہ اس کے بعد بائیں ہاتھ کے اسپنر ہرپریت برار کے خلاف محض پانچ گیندوں میں 19 رن جوڑے۔
سرفراز خان نے صرف 15 گیندوں پر اپنی نصف سنچری مکمل کی۔ بعد ازاں جب انہیں مینک مارکنڈے نے ایل بی ڈبلیو آؤٹ کیا تو وہ سات چوکوں اور پانچ چھکوں کی مدد سے 20 گیندوں پر 62 رن بنا چکے تھے۔
اس شاندار کارکردگی کے ساتھ سرفراز خان نے مہاراشٹر کے ابھیجیت کالے اور بڑودہ کے اتیت سیٹھ کا مشترکہ ریکارڈ توڑ دیا۔ ابھیجیت کالے نے 1995 میں بڑودہ کے خلاف 16 گیندوں پر نصف سنچری بنائی تھی، جبکہ اتیت سیٹھ نے 2021 میں چھتیس گڑھ کے خلاف یہ ریکارڈ قائم کیا تھا۔
یہ لسٹ اے کرکٹ کی تاریخ کی چوتھی تیز ترین نصف سنچری ہے۔ سب سے تیز نصف سنچری کا ریکارڈ سری لنکا کے کوشلیا ویرا رتنے کے نام ہے، جنہوں نے 06-2005کے سیزن میں یہ کارنامہ انجام دیا تھا۔
موجودہ وجے ہزارے ٹرافی میں سرفراز خان ممبئی کی جانب سے سب سے زیادہ رن بنانے والے بلے باز ہیں۔ انہوں نے چھ اننگز میں 75.75 کی اوسط اور 190.56 کے اسٹرائیک ریٹ سے مجموعی طور پر 303 رن اسکور کیے ہیں۔ سرفراز خان نے آخری بار فروری 2024 میں انگلینڈ کے خلاف ہندوستان کی نمائندگی کی تھی اور حالیہ دنوں میں وہ شاندار فارم میں نظر آ رہے ہیں۔