وی پی این پابندی کی خلاف ورزی پر۱۰؍افراد کے خلاف کارروائی 

سرینگر: جموں کشمیر کے ضلع شوپیاں میں پولیس نے سکیورٹی وجوہات کی بنا پر یونین ٹیریٹری میں ورچوئل پرائیویٹ نیٹ ورک (وی پی این) کے استعمال پر عائد پابندی کی خلاف ورزی کرنے پر۱۰؍افراد کے خلاف ’سکیورٹی کارروائی‘ شروع کی ہے، جبکہ پانچ نابالغوں کی کونسلنگ کی گئی ہے۔
حکام نے پیر‘۲۹دسمبر۲۰۲۵ کو شوپیاں اور کولگام اضلاع میں سکیورٹی خدشات کے پیشِ نظر وی پی این خدمات کے استعمال کو تاحکمِ ثانی معطل کر دیا تھا۔
پولیس کے ترجمان نے بتایا کہ جنوبی کشمیر کے ضلع میں احکامات کی تعمیل جانچنے کے لیے ضلع بھر میں تصدیقی مہم چلائی گئی، جس کے دوران۱۵؍افراد کی نشاندہی کی گئی جو مبینہ طور پر ان احکامات کی خلاف ورزی کر رہے تھے۔
ترجمان کے مطابق تفصیلی تکنیکی جانچ اور پس منظر کی تصدیق کے بعد کسی بھی فرد کے دہشت گردی سے متعلق روابط یا منفی سابقہ ریکارڈ سامنے نہیں آئے، اور اس معاملے میں کوئی ایف آئی آر درج نہیں کی گئی۔تاہم، احتیاطی اقدام کے طور پر احکامات کی خلاف ورزی پر۱۰؍افراد کے خلاف سیکیورٹی کارروائی شروع کی گئی، جبکہ باقی پانچ افراد نابالغ تھے۔
پولیس ترجمان نے کہا کہ نابالغوں کی ان کے سرپرستوں کی موجودگی میں کونسلنگ کی گئی اور انہیں آگاہی، قانونی ڈیجیٹل طرزِ عمل اور قانونی احکامات کی خلاف ورزی کے نتائج سے متعلق نصیحت کی گئی۔