میسی نے مسلسل دوسرا ایم ایل ایس ایم وی پی ایوارڈ جیت لیا

واشنگٹن، 10 دسمبر (یو این آئی) لیونل میسی نے لگاتار دوسرا ایم ایل ایس (میجر لیگ سوکر) ایم وی پی (انتہائی قیمتی کھلاڑی) ایوارڈ جیت لیا ہے، جس کے ساتھ ہی انہوں نے ایک ایسے سال کا اختتام کیا جس میں انہوں نے انٹر میامی کو اس کا پہلا ایم ایل ایس کپ خطاب جیتنے میں مدد دی۔
میسی کو کل ووٹوں کا 70.43 فیصد حصہ ملا، جس میں میڈیا، کھلاڑیوں اور کلب کے تکنیکی عملے کے ووٹ شامل تھے، اور وہ فائنلسٹ آندرس ڈریئر، ڈینس بوانگا، ایونڈر اور سیم سریج سے آگے رہے۔
ایوارڈ وصول کرتے ہوئے ارجنٹائنی اسٹار نے کہا، "یہ ایک لمبا سال تھا، جس میں بہت سے میچ اور بہت سفر تھا، لیکن کلب کے لیے یہ ایک تاریخی سال بھی تھا، کیونکہ یہ پہلا موقع تھا جب ہم نے ایم ایل ایس کپ جیتا۔”
انہوں نے مزید کہا،یہ ایک عظیم کلب ہے، جو ابھی بھی کافی نیا ہے اور جو کچھ ہم حاصل کر سکے وہ حیرت انگیز اور بہت خاص تھا۔ 38 سالہ فارورڈ نے ریگولر سیزن کے 28 میچوں میں 29 گول اسکور کیے اور 19 بار گول کرنے میں مدد کی ۔ انہوں نے سیزن کے بعد کے 6 میچوں میں مزید 6 گول اور 9 اسسٹ بھی دیے۔فائنل میں کلیدی کردار: ہفتے کے روز فائنل میں ان کے دو اسسٹ اہم تھے، کیونکہ انٹر میامی نے وینکوور وائٹ کیپس کو 3-1 سے شکست دے کر ٹائٹل اپنے نام کیا۔آٹھ بار کے بیلن ڈی’ آور فاتح اور 2022 کے عالمی چیمپئن میسی، ایم ایل ایس تاریخ کے پہلے کھلاڑی بن گئے ہیں جنہوں نے لگاتار دو بار ایم وی پی جیتا۔