الور، 28 نومبر (یو این آئی) راجستھان کے بھیواڑی میں بڑھتی ہوئی فضائی آلودگی پر قابو پانے اور گریڈڈ رسپانس ایکشن پلان (گریپ) کی مؤثر تعمیل کو یقینی بنانے کے لیے ضلع انتظامیہ، میونسپل کونسل اور کئی دیگر محکموں نے جمعرات کے روز مشترکہ طور پر بڑے پیمانے پر کارروائی کی اور 4 لاکھ 63 ہزار روپے کا جرمانہ عائد کیا۔ ضلع کلکٹر آرتیکا شکلا نے جمعہ کے روز بتایا کہ مختلف محکموں نے کل 352 معائنہ کیے ، جن میں 86 خلاف ورزیاں پائی گئیں۔ کارروائی کے دوران آلودگی کنٹرول بورڈ، میونسپل کونسل اور ریکو نے کل 82 چالان کیے اور چار لاکھ اڑتالیس ہزار روپے کا جرمانہ عائد کیا۔
انہوں نے بتایا کہ غیر قانونی کچرا تلف کرنے کو روکنے کے لیے چھ معائنے کیے گئے اور تین چالان جاری کرکے دو ہزار روپے کا جرمانہ وصول کیا گیا۔ اس کے علاوہ کچرا جلانے کی سرگرمیوں پر قابو پاتے ہوئے آٹھ معائنے کیے گئے ۔ اس دوران پانچ چالان جاری کیے گئے اور تیرہ ہزار روپے کا جرمانہ عائد کیا گیا۔ راجستھان اسٹیٹ آلودگی کنٹرول بورڈ (آر ایس پی سی بی) نے 76 صنعتی یونٹس کا معائنہ کیا، جن میں دو خلاف ورزیاں پائی گئیں۔ ایک یونٹ کو مہر بند کیا گیا، جبکہ ایک معاملے کو مزید کارروائی کے لیے ہیڈکوارٹر بھیجا گیا۔ معیارات کی پابندی نہ کرنے والے ایک ڈی جی سیٹ کو مہر بند کیا گیا۔ ٹرانسپورٹ ڈیپارٹمنٹ اور ٹریفک پولیس نے بغیر آلودگی سرٹیفکیٹ کے 11 گاڑیوں کے چالان کیے ۔ اسی طرح سڑک پر دھول کم کرنے کے لیے مختلف محکموں نے 28 ٹینکر اور پانی چھڑکنے والی گاڑیاں تعینات کیں۔ اس کے ساتھ ہی سڑک پر دھول صاف کرنے والی چار مشینیں تعینات کی گئیں، اس کے تحت کل 31 کلومیٹر سڑک کی صفائی کا کام کیا گیا۔
