کسان 2 روپے فی کلو پیاز فروخت کرنے پر مجبور، حکومت کو کوئی فکر نہیں: کانگریس

نئی دہلی، 12 نومبر (یو این آئی) کانگریس پارٹی نے مدھیہ پردیش کی منڈیوں میں کسانوں کو دو روپے فی کلوپیاز بیچنے پر مجبورہونے کے واقعہ پر گہری تشویش کا اظہار کرتے ہوئے کہا ہے کہ بی جے پی حکومت کو کسانوں کی کوئی پرواہ نہیں ہے اور کسان اپنی پیداوار سستے داموں بیچنے پر مجبور ہورہے ہیں۔
بدھ کو اپنے آفیشل پیج ایکس پر ایک پوسٹ میں، کانگریس نے کہا کہ مدھیہ پردیش کے کسانوں کو اپنے خون پسینے سے تیار فصلوں کو معمولی قیمت پر فروخت کرنا پڑرہا ہے ۔ اس کے ساتھ ہی پارٹی نے رتلام کی ایک زرعی منڈی میں ایک کسان کے ذریعہ فروخت کی گئی پیاز کی رسید کو پوسٹ کیا ہے ۔ پارٹی کا دعویٰ ہے کہ رسید میں دو کوئنٹل پیاز کی قیمت 202 روپے لگائی گئی ہے ۔
پارٹی نے کہا، "مدھیہ پردیش میں پیاز کے کسان خون کے آنسو رو رہے ہیں۔ یہاں کے بازار میں پیاز دو روپے فی کلو گرام کے حساب سے فروخت ہو رہی ہے ۔ کسان اپنی پیداوار سستے داموں بیچنے پر مجبور ہیں۔ انہیں ان کی پیداوار کی صحیح قیمت نہیں مل رہی ہے ۔ وزیر اعظم نریندر مودی نے کسانوں کی آمدنی دوگنی کرنے کا وعدہ کیا تھا لیکن انہیں برباد کر دیا ہے ۔