بابر اعظم ٹی ٹونٹی انٹرنیشنل میں سب سے زیادہ رنز بنانے والے بیٹر بن گئے

لاہور یکم نومبر(یو این آئی ) پاکستان کرکٹ ٹیم کے بیٹر بابر اعظم نے ایک اور اہم اعزاز حاصل کرلیا۔
بابر اعظم نے ہندوستان کے سابق کپتان روہت شرما کا ٹی ٹونٹی انٹرنیشنل میں سب سے زیادہ رنز بنانے کا ورلڈ ریکارڈ توڑ دیا۔ انہوں نے یہ کارنامہ لاہور میں جنوبی افریقا کے خلاف سیریز کے دوسرے ٹی ٹونٹی میں سر انجام دیا۔
روہت شرما نے ٹی ٹونٹی انٹرنیشنل میں مجموعی طور پر 159 میچوں میں 4231 رنز بنائے تھے جب کہ بابر کو روہت کا ریکارڈ توڑنے کیلئے صرف 9 رنز درکار تھے ۔
بابر نے جنوبی افریقا کے خلاف ٹی ٹوئنٹی میں اپنی اننگز کا 9 واں رنز مکمل کرکے ٹی ٹونٹی انٹرنیشنل میں سب سے زیادہ رنز بنانے والے بیٹر کا اعزاز حاصل کیا۔ روہت شرما نے 4231 رنز 159 میچز کھیل کر بنائے اور ان کی رنز بنانے کی اوسط 32 رہی جب کہ بابر اعظم نے یہ اعزاز اپنے 130 ویں ٹی 20 انٹرنیشنل اور 122 ویں اننگ میں حاصل کیا۔ ان کی رنز بنانے کی اوسط 39.46 کی اوسط سے نمبر ون بیٹر بننے کا اعزاز اپنے نام کیا۔
بابر اعظم نے اب تک اپنے ٹی 20 انٹرنیشنل کیریئر میں 3 سنچریاں اور 36 نصف سنچریاں بنا رکھی ہیں۔
واضح رہے کہ پاکستان کے سابق کپتان بابر اعظم جنہوں نے ماضی میں بہترین بیٹنگ کا مظاہرہ کر کے تن تنہا کئی میچز پاکستان کو جتوا رکھے ہیں۔
واضح رہے کہ گزشتہ سال دسمبر میں جنوبی افریقا کے خلاف سیریز کے بعد مختصر فارمیٹ کی ٹیم سے باہر تھے۔ ایشیاء کپ 2025ء میں ناکامی کے بعد بابر اعظم کو جنوبی افریقا کے خلاف ہوم ٹی ٹونٹی سیریز کے لیے دوبارہ ٹیم میں شامل کیا گیا۔