ابھشیک شرما نے وراٹ کوہلی کی برابری کی

میلبورن، 31 اکتوبر (یواین آئی) ابھشیک شرما آسٹریلیا کے خلاف ٹی 20 انٹرنیشنل کرکٹ میں تیسری تیز ترین نصف سنچری بنانے والے ہندوستانی بلے باز بن گئے ہیں۔
آسٹریلیا میں سب سے تیز ٹی 20 نصف سنچری بنانے کا ریکارڈ روہت شرما کے نام ہے، جنہوں نے 2024 میں گروس آئی لیٹ میں صرف 19 گیندوں پر یہ کارنامہ انجام دیا تھا۔ اسی فہرست میں دوسرے نمبر پر یووراج سنگھ ہیں، جنہوں نے 2007 میں ڈربن میں 20 گیندوں پر پچاس رن بنائے تھے۔ تاہم، آسٹریلیا میں کسی بھی ہندوستانی بلے باز کی جانب سے یہ سب سے تیز نصف سنچری ہے۔
اس نصف سنچری کے ساتھ ابھشیک شرما نے ٹی 20 کرکٹ میں ہندوستان کی جانب سے اپنی ابتدائی 25 اننگز میں سب سے زیادہ 50 پلس اسکور کرنے کے معاملے میں وراٹ کوہلی کی برابری کر لی ہے۔ کوہلی نے اپنی پہلی 25 ٹی 20 انٹرنیشنل اننگز میں 8 مرتبہ 50 سے زیادہ رن بنائے تھے، جب کہ اب ابھشیک نے بھی اپنی ابتدائی 25 اننگز میں یہی کارنامہ انجام دیا ہے۔