سلمان آغا ٹی ٹونٹی کا کھلاڑی نہیں، زبردستی فٹ کیا جارہا ہے : کامران اکمل

لاہور 29 اکتوبر (یو این آئی ) پاکستان کے سابق کرکٹر کامران اکمل کا کہنا ہے کہ پا کستانی کپتان سلمان علی آغا ٹی 20 کا کھلاڑی نہیں زبردستی فٹ کیا جارہا ہے۔ ایک پروگرام میں گفتگو کرتے ہوئے کامران اکمل نے کہا کہ سلمان آغا کو ٹی 20 کرکٹ میں نہیں کھلانا چاہیے ان کا کیریئر بچانا چاہیے، وہ مختصر فارمیٹ کھیلیں گے تو دباؤ میں آجائیں گے۔
انہوں نے کہا کہ سلمان آغا کی بجائے ٹی 20 کا کپتان شاہین آفریدی کو ہونا چاہیے، بابر اعظم ایک سال بعد ٹیم میں آئے تھوڑا وقت دیا جاسکتا ہے۔ کامران اکمل نے کہا کہ سلیکشن کمیٹی، کوچ، کپتان پاکستان کی شکست کے ذمہ دار ہیں، پاکستان ٹیم اچھی ٹیموں سے ہار رہی ہے، ہماری کرکٹ بری ہوتی جارہی ہے۔ سابق کرکٹر نے کہا کہ ہماری کرکٹ ٹیم کی کارکردگی ہر دن کے ساتھ بری ہوتی جارہی ہے، جو ایسے کھلاڑیوں ٹیم میں کھلاتے ہیں وہی شکست کے ذمہ دار ہیں۔
انہوں نے کہا کہ ہمارے بلے بازوں کی فاسٹ بولرز کو کھیلنے کی تکنیک ہی صحیح نہیں، ہمارے کھلاڑیوں کے بلے پر بال آہی نہیں رہی تھی، ٹیم کو کوئی پلاننگ نہیں ہوگی تو پھر ایسے ہی نتائج ہوں گے۔