جیسوال رنجی ٹرافی کے تیسرے راؤنڈ میں ممبئی کے لیے کھیلیں گے

ممبئی، 28 اکتوبر (یو این آئی) ہندوستانی اوپنر یشسوی جیسوال یکم نومبر سے شروع ہونے والی 2025-26 رنجی ٹرافی کے اگلے راؤنڈ میں کھیلنے کے لیے تیار ہیں۔ ممبئی اس راؤنڈ کے دوران جے پور میں راجستھان کے خلاف ایلیٹ گروپ ڈی کا ایک میچ کھیلے گی۔
آسٹریلیا کے دورے سے واپس آنے کے بعد جیسوال نے جنوبی افریقہ کے خلاف 14 نومبر سے کولکتہ میں شروع ہونے والی ہوم ٹیسٹ سیریز سے پہلے خود کو میچ فٹ رکھنے کی خواہش ظاہر کی ہے۔ یہ بی سی سی آئی کی ہدایت کے مطابق ہے کہ تمام کنٹریکٹ یافتہ کھلاڑی اگر دستیاب ہوں تو گھریلو مقابلوں میں شرکت کریں۔ ذرائع کے مطابق جیسوال نے ممبئی سلیکشن کمیٹی کے چیئرمین سنجے پاٹل کو اپنی دستیابی سے آگاہ کر دیا ہے۔ پاٹل اور ان کی سلیکشن کمیٹی موجودہ راؤنڈ منگل کو ختم ہونے کے بعد راجستھان کے خلاف میچ کے لیے ٹیم کا انتخاب کرے گی۔
اس نے پہلے گوا کے لیے این او سی (نو آبجیکشن سرٹیفکیٹ) طلب کیا تھا۔ انہوں نے آخری بار بی کے سی گراؤنڈ میں جموں و کشمیر کے خلاف گروپ میچ میں ممبئی کے لیے کھیلا تھا۔ ممبئی نے سیزن کا آغاز جموں و کشمیر کے خلاف جیت کے ساتھ کیا، لیکن بارش نے انہیں چھتیس گڑھ کے خلاف اپنے گھریلو میچ میں فیصلہ کن فتح حاصل کرنے سے روک دیا۔