پرتھوی شا نے رنجی ٹرافی کی دوسری تیز ترین ڈبل سنچری اسکور کی

چنڈی گڑھ، 27 اکتوبر (یو این آئی) قومی ٹیم میں واپسی کی کوشش کر رہے نوجوان ہندوستانی بلے باز پرتھوی شا نے پیر کو چنڈی گڑھ کے خلاف رنجی ٹرافی میچ میں شاندار کارکردگی کا مظاہرہ کرتے ہوئے ٹورنامنٹ کی دوسری تیز ترین ڈبل سنچری حاصل کی۔ پہلی اننگز میں آٹھ رنز بنا کر آؤٹ ہونے والے شا نے اپنی بیٹنگ کا انداز جارحانہ رکھتے ہوئے چندی گڑھ کے گیند بازوں پر شروع ہی سے حملہ کیا، انہوں نے اپنی اننگز کو تیز کرتے ہوئے صرف 72 گیندوں میں 17 چوکے لگا کرسنچری بنائی، جو مہاراشٹر کے لیے ان کی پہلی سنچری تھی۔
شا نے اپنی جارحانہ بلے بازی کا سلسلہ جاری رکھتے ہوئے 141 گیندوں میں اپنی ڈبل سنچری مکمل کی، جو پلیٹ گروپ میچوں کو چھوڑ کر رنجی ٹرافی کی دوسری تیز ترین ڈبل سنچری تھی۔ اس سے قبل روی شاستری نے صرف 123 گیندوں میں ڈبل سنچری بنائی تھی۔ شا 200 سے کم گیندوں میں دو فرسٹ کلاس ڈبل سنچریاں بنانے والے دوسرے ہندوستانی بلے باز بن گئے۔ وریندر سہواگ نے ہندوستان کے لیے یہ کارنامہ سب سے زیادہ تین مرتبہ حاصل کیا ہے۔ شا نے 156 گیندوں میں 29 چوکوں اور پانچ چھکوں کی مدد سے 222 رنز بنائے۔ انہیں 51ویں اوور میں ارجن آزاد نے آؤٹ کیا۔