چوٹ سے صحت یاب ہونے کے بعد ٹیمبا باوُما ہندوستان کے خلاف ٹیسٹ سیریز کے لیے جنوبی افریقہ کی ٹیم میں شامل

پریٹوریا، 27 اکتوبر (یو این آئی) ٹیمبا باوُما کو پِنڈلی کی چوٹ سے مکمل طور پر صحت یاب ہونے کے بعد اگلے ماہ ہندوستان کے خلاف دو ٹیسٹ میچوں کی سیریز کے لیے ٹیم میں جنوبی افریقہ کے کپتان کے طور پر شامل کیا گیا ہے۔
باوُما کو ستمبر میں انگلینڈ میں کھیلتے ہوئے چوٹ لگی تھی، جس کی وجہ سے وہ پاکستان کے خلاف ورلڈ ٹیسٹ چیمپئن شپ ٹائٹل ڈیفنس کی شروعات میں نہیں کھیل پائے تھے۔ وہ اس ہفتے پاکستان میں شروع ہونے والے کسی بھی ون ڈے یا ٹی-20 میچ میں حصہ نہیں لیں گے، البتہ ٹیسٹ ٹیم میں شامل ہونے سے پہلے وہ بنگلورو میں انڈیا اے کے خلاف فرسٹ کلاس میچ میں جنوبی افریقہ اے ٹیم کا حصہ ہوں گے۔
جنوبی افریقہ کے سلیکٹرز نے پاکستان میں ڈرا سیریز کھیلنے والی ٹیم میں واحد بلے بازی میں تبدیلی کرتے ہوئے باوُما کو ٹیم میں شامل کیاہے۔ انہیں مڈل آرڈر بیٹسمین ڈیوڈ بیڈنگھم کی جگہ ٹیم میں شامل کیا گیا ہے۔ بیڈنگھم نے جنوبی افریقہ کے لیے 15 ٹیسٹ میچ کھیلے ہیں، جن میں ایک سنچری اور چار نصف سنچریاں شامل ہیں۔ تاہم بولاؤایو میں زمبابوے کے خلاف 82 رنز بنانے سے پہلے انہوں نے 12 اننگز میں ایک بھی نصف سنچری نہیں بنائی تھی۔ ٹونی ڈی زروجی، ٹرسٹن سٹبس، ڈیوالڈ بریوس اور زبیر حمزہ سبھی ٹیم میں شامل ہیں۔
جنوبی افریقہ نے پاکستان کے خلاف شاندار کارکردگی کا مظاہرہ کرنے والے تین اسپیشلسٹ اسپنرز — کیشو مہاراج، سائمن ہارمر اور سینورا متھوسامی — کو ٹیم میں برقرار رکھا ہے۔ جبکہ کگیسو ربادا، کاربن بوش اور مارکو یانسن فاسٹ بولنگ کا شعبہ سنبھالیں گے۔ دو میچوں کی سیریز 14 دسمبر کو کولکاتہ میں شروع ہوگی، جبکہ دوسرا ٹیسٹ 22 دسمبر سے گوہاٹی میں کھیلا جائے گا۔ جنوبی افریقہ ہندوستان میں تین ون ڈے اور پانچ ٹی-20 میچ بھی کھیلے گا۔
ہندوستان کے خلاف ٹیسٹ سیریز کے لیے جنوبی افریقہ کی ٹیم: ٹیمبا باوُما (کپتان)، ایڈن مارکرم، ریان رکلٹن، ٹرسٹن سٹبس، کائل ویرین، ڈیوالڈ بریوس، زبیر حمزہ، ٹونی ڈی زروجی، کاربن بوش، ویان ملڈر، مارکو یانسن، کیشو مہاراج، سینورا متھوسامی، کگیسو ربادا اور سائمن ہارمر