بنگلہ دیش اور ویسٹ انڈیزکا فیصلہ کن ون ڈے کرکٹ میچ جمعرات کو

ڈھاکہ 22 اکتوبر(یو این آئی ) بنگلہ دیش اور ویسٹ انڈیز کی کرکٹ ٹیموں کے درمیان تین ایک روزہ بین الاقوامی میچوں پر مشتمل سیریز کا تیسرا اور فیصلہ کن میچ کل (جمعرات کو) شیر بنگلہ نیشنل سٹیڈیم، ڈھاکہ میں کھیلا جائے گا۔ ویسٹ انڈیز کی کرکٹ ٹیم اپنے دورہ بنگلہ دیش کے دوران میزبان ٹیم کے خلاف ایک 3 ون ڈے اور 3 ٹی ٹونٹی میچوں کی سیریز کھیلے گی۔
ون ڈے سیریز کے دو میچز کھیلے جا چکے ہیں جن میں دونوں ٹیموں کے درمیان مقابلہ 1-1 سے برابر ہے۔ بنگلہ دیش ٹیم نے پہلے ون ڈے میچ میں ویسٹ انڈیز کی ٹیم کو 74 رنز سے شکست دی جبکہ ویسٹ انڈیز کی ٹیم نے جاندار کم بیک کرتے ہوئے میزبان بنگلہ دیشی ٹیم کو سپر اوور میں شکست دی تھی۔
ون ڈے سیریز میں بنگلہ دیشی ٹیم کو مہدی حسن مرزا لیڈ کریں گے جبکہ ویسٹ انڈیز ٹیم کو شائی ہوپ لیڈ کریں گے ۔
دونوں ٹیموں کے درمیان تیسرا اور فیصلہ کن ون ڈے میچ 23اکتوبر کو کھیلا جائے گا۔تینوں ون ڈے میچز شیر بنگلہ نیشنل سٹیڈیم، ڈھاکہ میں شیڈول ہیں ۔تین ٹی ٹونٹی میچوں کی سیریز کا آغاز 27 اکتوبر کو پہلے میچ سے ہوگااور بقیہ میچز بالترتیب 29 اور 31 اکتوبر کو کھیلے جائیں گے۔ ٹی ٹونٹی سیریز کے تمام میچز ایم اے عزیزسٹیڈیم،چٹوگرام میں کھیلے جائیں گے۔