الہ آباد ہائی کورٹ کے حکم پر سپریم کورٹ نے روک لگائی

نئی دہلی، 25 ستمبر (یو این آئی) سپریم کورٹ نے جمعرات کے روز الہ آباد ہائی کورٹ کے اس حکم پر روک لگا دی ہے ، جس میں اتر پردیش کے فیروز آباد کے ایک اسکول میدان میں جاری رام لیلا جشن پر پابندی عائد کی گئی تھی۔
جسٹس سوریہ کانت، جسٹس اجل بھوئیاں اور جسٹس این کوٹیشور سنگھ کی بینچ نے شری نگر راملیلا مہوتسو کی عرضی پر یہ حکم سنایا۔ بینچ نے رام لیلا تقریب جاری رکھنے کی اجازت اس شرط پر دی کہ اسکول کے طلباء کی پڑھائی میں کوئی رکاوٹ نہ آئے ۔ سپریم کورٹ نے اس حقیقت پر بھی غور کیا کہ اسکول میدان کا استعمال تقریباً 100 سالوں سے مختلف تقریبات کے لیے ہوتا رہا ہے ۔ عدالت نے یہ بھی واضح کیا ہے کہ وہ اسکول کے میدان کا استعمال (بار بار تقریبات کے لیے ) کی اجازت نہیں دے رہی ہے ۔
بینچ نے (آنے والے وقت کے لیے ) ہائی کورٹ سے درخواست کی کہ وہ متعلقہ ضلع انتظامیہ کو رام لیلا تقریب کے لیے کوئی متبادل مقام مقرر کرنے کو کہے تاکہ اس مسئلے کا حل نکلے اور اسکول کا کھیل میدان صرف طلباء کے لیے ہی استعمال کیا جا سکے ۔ بینچ نے کہا کہ کوئی بھی فیصلہ لینے سے پہلے تمام فریقین کی دلیلیں سنی جائیں گی۔
ہائی کورٹ نے مفاد عامہ کی عرضی پر حکم سنایا تھا۔ عرضی میں الزام لگایا گیا تھا کہ اسکول کھیل میدان میں سیمنٹ کی انٹر لاکنگ ٹائلیں لگائی گئی تھیں تاکہ اسے رام لیلا جیسے پروگراموں کے لیے مستقل جگہ میں تبدیل کیا جا سکے ۔