پارٹی کے داخلی اختلافات کے درمیان سونیا اور راہل گاندھی وا ناڈ پہنچے

وایناڈ، 19 ستمبر (یو این آئی) لوک سبھا میں قائد حزب اختلاف راہل گاندھی اور کانگریس پارلیمانی پارٹی (سی پی پی) کی چیئرپرسن سونیا گاندھی پارٹی میں اندرونی کشمکش کی وجہ سے پیدا ہوئے بحران کے درمیان جمعہ کو دو روزہ دورے پر وایناڈ پہنچے ۔
کانگریس لیڈر صبح تقریباً دس بجے ایک چارٹرڈ طیارے سے ضلع ملپّرم کے کریپور ہوائی اڈے پر اترے ۔ بعد میں وہ ہیلی کاپٹر کے ذریعے وایناڈ پہنچے اور قریب پونے گیارہ بجے پدِنجراتھر اسکول میدان میں اترے ۔ رکن پارلیمنٹ پرینکا گاندھی، کانگریس کے جنرل سکریٹری کے ۔ سی۔ وینوگوپال، کیرالہ پردیش کانگریس کمیٹی (کے پی سی سی) کے صدر سنی جوزف اور دیگر پارٹی کارکنوں نے ان کا استقبال کیا۔
مقامی بلدیاتی اور اسمبلی انتخابات کی حکمتِ عملی تیار کرنے کے لیے یہ لیڈر کانگریس کے اہم رہنماؤں اور کے پی سی سی صدر کے ساتھ ایک اہم میٹنگ کریں گے ۔
غور طلب ہے کہ مسٹر گاندھی اور محترمہ سونیا گاندھی کا یہ دورہ کانگریس جنرل سکریٹری پرینکا گاندھی کے 10 روزہ عوامی رابطہ پروگرام کے بعد ہو رہا ہے ، جو اہم شخصیات اور آدی واسی عوام سے ملنے کے لیے اپنے گھریلو انتخابی حلقے میں مقیم تھیں۔ اطلاعات کے مطابق انہوں نے کے پی سی سی کے تئیں اپنی ناراضگی ظاہر کی تھی اور داخلی اختلافات کی وجہ سے حال ہی میں مقامی پارٹی رہنماؤں کی خودکشی سے پیدا بحران پر رپورٹ طلب کی تھی۔
مرحوم رہنماؤں میں ڈی سی سی خزانچی این۔ ایم۔ وجین اور مُلانکولی گرام پنچایت کے رکن جوس نیلادم شامل ہیں۔ مسٹر وجین کی بہو پدمجا وِجیش نے بھی 14 ستمبر کو خودکشی کی کوشش کی تھی۔
اپنے دورے کے دوران محترمہ پرینکا نے ابھی تک صدر این۔ ڈی۔ اپّاچن سمیت ڈی سی سی رہنماؤں سے ملاقات نہیں کی تھی اور نہ ہی مرحوم مقامی رہنماؤں کے گھروں کا دورہ کیا تھا۔