نئی دہلی، 15 اکتوبر (یو این آئی) کانگریس کے جنرل سکریٹری اور پنجاب کے انچارج سچن پائلٹ ریاست میں گینگ وار اور منظم جرائم سے متاثرہ خاندانوں سے ملاقات کر کے ان کے مسائل سننے اور انصاف کا مطالبہ اٹھانے کے لیے 16 سے 20 اکتوبر تک ریاست کا پانچ روزہ دورہ کریں گے۔
اس دوران مسٹر پائلٹ گینگسٹر تشدد میں اپنے پیاروں کو کھونے والے خاندانوں سے مل کر ان سے تعزیت کا اظہار کریں گے اور انہیں انصاف دلانے کا مطالبہ اٹھائیں گے۔
یہاں جاری بیان کے مطابق مسٹر پائلٹ کا یہ دورہ موگا، بٹھنڈہ، مانسا، لدھیانہ، جالندھر، کپورتھلہ، ہوشیار پور، پٹھان کوٹ، گرداسپور، ترن تارن اور امرتسر سمیت کئی اضلاع سے ہو کر گزرے گا۔ ہر ضلع میں وہ متاثرہ خاندانوں کے گھر جا کر ان کی آپ بیتی سنیں گے اور پولیس و ریاستی حکومت کی طرف سے کی گئی کارروائی کی معلومات حاصل کریں گے۔
بیان میں کہا گیا ہے کہ گینگ وار اور منظم جرائم سے جڑے کئی واقعات میں متاثرہ خاندان طویل عرصے سے ملزمان کی گرفتاری، چارج شیٹ داخل ہونے اور منصفانہ سماعت کا انتظار کر رہے ہیں۔ کچھ خاندانوں کو مہینوں سے لے کر سالوں تک انصاف نہیں مل سکا ہے۔ مسٹر پائلٹ کے اس دورے کا مقصد متاثرہ خاندانوں کی آواز عوام اور حکومت تک پہنچانا ہے۔
وہیں، ضرورت پڑنے پر ان کے انصاف کا مطالبہ عدالتوں میں بھی اٹھایا جائے گا۔ کانگریس نے پنجاب میں امن و قانون کی صورتحال بگڑنے کا الزام لگاتے ہوئے عام آدمی پارٹی حکومت کے طریقہ کار پر سوالات اٹھائے ہیں۔
