خواتین نابینا ٹی-20 ورلڈ کپ کی میزبانی ہندوستان اور سری لنکا کے سپرد

بنگلورو، 16 ستمبر (یو این آئی) کرکٹ ایسوسی ایشن فار دی بلائنڈ اِن انڈیا (سی اے بی آئی) نے آج اعلان کیا کہ سری لنکا پہلی بار نابینا خواتین ٹی-20 ورلڈ کپ کرکٹ کا شریک میزبان ہوگا، جو 11 سے 25 نومبر 2025 تک کھیلا جائے گا۔
اصل منصوبے کے مطابق یہ ٹورنامنٹ نئی دہلی، بنگلورو اور کٹھمنڈو (نیپال) میں ہونا تھا، لیکن ورلڈ بلائنڈ کرکٹ کونسل (ڈبلیو بی سی سی) کی 15 ستمبر کو ورچوئل میٹنگ میں فیصلہ کیا گیا کہ پاکستان کے میچوں کے لیے کولمبو (سری لنکا) کو غیر جانبدار مقام بنایا جائے اور نیپال کی موجودہ صورتحال کے پیشِ نظر ایک اضافی میزبان شہر بھی شامل کیا جائے۔
سی اے بی آئی کے عہدیدار جلد ہی کولمبو میں اپنے ہم منصبوں سے مشاورت شروع کریں گے۔
ٹورنامنٹ میں کُل 21 لیگ میچ، دو سیمی فائنل اور ایک فائنل کھیلا جائے گا۔ یہ مقابلے نئی دہلی، بنگلورو اور کولمبو میں ہوں گے۔
آئندہ ورلڈ کپ کے بارے میں بات کرتے ہوئے سی اے بی آئی کے صدر ڈاکٹر مہنتیش جی. کیواداسناور نے کہا کہ یہ ورلڈ کپ صرف ایک ٹورنامنٹ نہیں بلکہ حوصلے، مہارت اور شمولیت کا جشن ہے۔ ہندوستان میں اس کی میزبانی ہمارے لیے فخر کی بات ہے اور مجھے یقین ہے کہ ہماری خواتین کھلاڑی اس کسوٹی پر پوری اتریں گی، لاکھوں لوگوں کو متاثر کریں گی اور ملک کا نام روشن کریں گی۔
اس ٹورنامنٹ میں آسٹریلیا، انگلینڈ، ہندوستان، نیپال، پاکستان، سری لنکا اور امریکہ کی ٹیمیں حصہ لیں گی۔
یو این آئی ۔ م ع۔ایس وائی۔