ایل جی سنہا کی چھٹی سنگھ پورہ قتل عام کی مکمل تحقیقات کی یقین دہانی

شہید سنگھز ویلفیئر آرگنائزیشن، چھٹی سنگھ پورہ کے وفد نے آج اپنے چیئرمین سردار جگجیت سنگھ کی قیادت میں لیفٹیننٹ گورنر شری منوج سنہا سے ملاقات کی۔
وفد کے اراکین نے ۲۰ مارچ ۲۰۰۰ کو پاکستان پرست دہشت گردوں کے ہاتھوں اننت ناگ کے چھٹی سنگھ پورہ میں۳۵ سکھوں کے قتل عام کی نئی تحقیقات کا مطالبہ کیا۔
وفد نے جاں بحق شہریوں کے لواحقین کے لیے مختلف فلاحی مسائل بھی اٹھائے، جن میں ایس آر او۴۳ کے تحت ہمدردانہ بنیادوں پر نوکریاں، غیر مہاجر کشمیری پنڈتوں کے برابر فوائد کی توسیع، سرکاری یونیورسٹیوں/کالجوں میں داخلوں میں ریزرویشن، اور اننت ناگ کے چھٹی سنگھ پورہ میں یادگار کی تعمیر کے لیے مالی امداد شامل تھی۔
لیفٹیننٹ گورنر نے جموں و کشمیر میں دہشت گردی سے متاثرہ خاندانوں کو انصاف فراہم کرنے کے اپنے عزم کا اعادہ کیا۔ انہوں نے یقین دلایا کہ اس معاملے کی مکمل اور جامع تحقیقات ہوں گی اور متاثرہ خاندانوں کو انصاف فراہم کیا جائے گا۔
سنہا نے کہا کہ قتل عام میں ہلاک ہوئے شہریوں کے خاندانوں کے مسائل اور شکایات کو انتہائی حساسیت اور ترجیحی بنیادوں پر حل کیا جائے گا۔ انہوں نے مزید یقین دلایا کہ اہل خانہ کے مستحق افراد کو ہمدردانہ بنیادوں پر نوکریاں فراہم کی جائیں گی اور خود روزگار کے لیے مالی امداد بھی دی جائے گی۔
دریں اثنا شری سادھو گنگا آستھاپن ٹرسٹ، کانڈی خاص اور شری شاردا آستھاپن ٹرسٹ، گند گشی کپواڑہ کا ایک مشترکہ وفد بھی آج لیفٹیننٹ گورنر شری منوج سنہا سے ملا۔