پنجاب میں سیلاب سے تباہی جاری، تعلیمی اداروں میں سات ستمبر تک تعطیلات کا اعلان

چنڈی گڑھ، 03 ستمبر (یواین آئی) ہماچل پردیش، جموں و کشمیر اور پنجاب میں گزشتہ تین دن سے جاری بارش کے باعث بھاکھڑا اور پونگ ڈیم میں سطح آب بڑھ گئی ہے ۔
ریاست کے تمام 23 اضلاع کے 1200 سے زائد گاؤں سیلاب سے متاثر ہوئے ہیں۔سیلاب نے اب تک 30 لوگوں کی جان لے لی ہے ۔ گھگر ندی کا پانی خطرے کے نشان کے قریب پہنچ گیا ہے ۔
موہالی میں ضلع انتظامیہ نے الرٹ کر دیا ہے ۔ریاستی حکومت نے پورے پنجاب کو آفت زدہ قرار دے دیا ہے ۔
چیف سکریٹری اے پی سنہا کے خط کے مطابق تمام ملازمین کی چھٹیاں منسوخ کر دی گئی ہیں۔اسکولوں اور کالجوں میں تعطیلات بھی سات ستمبر تک بڑھا دی گئی ہیں۔
پنجاب کے وزیر تعلیم ہرجوت سنگھ بینس نے کہا، ‘‘وزیراعلیٰ بھگونت سنگھ مان کے احکامات کے مطابق، سیلاب کی صورتحال کے پیش نظر پنجاب کے تمام سرکاری/ معاونت یافتہ/ تسلیم شدہ اور نجی اسکول، کالج، یونیورسٹی اور پولی ٹیکنک ادارے سات ستمبر 2025 تک بند رہیں گے ۔’’مسٹر سنہا نے ایک سرکاری خط جاری کرکے پوری ریاست کو آفت زدہ قرار دے دیا ہے ۔
خط میں بتایا گیا ہے کہ مسلسل بارش اور ڈیم سے پانی چھوڑنے کی وجہ سے ریاست کے 1200 سے زائد گاؤں سیلاب کی زد میں ہیں اور لاکھوں افراد متاثر ہیں۔
انہوں نے خط میں حکام اور محکموں کو چھ ہدایات بھی دی ہیں۔ضلع مجسٹریٹ کو اختیاردیا گیا ہے کہ اگر کسی علاقے میں سیلاب یا آفت کا خطرہ سنگین ہو جائے تو وہ قانون کے تحت تمام ضروری احکامات جاری کر سکتے ہیں۔اس کا مقصد یہ ہے کہ متاثرہ علاقوں میں جلد اور مناسب اقدامات کیے جائیں تاکہ لوگوں کے جان و مال کی حفاظت ہو سکے ۔
اضلاع کے قدرتی آفات کے یونٹس (ڈی ڈی ایم اے ) فوری طور پر متاثرین کی مدد کریں۔اس میں خوراک، پانی، دوا اور محفوظ مقام فراہم کرنا شامل ہے ۔
ان کا کام یہ ہے کہ لوگ محفوظ رہیں اور امدادی سامان بروقت پہنچایا جائے ۔ریاست کے تمام محکموں کو کہا گیا ہے کہ وہ اپنے ہنگامی فرائض میں مکمل طور پر مصروف رہیں۔
ملازمین کے لیے یہ ضروری ہے کہ وہ چھٹی یا ہفتہ وارتعطیل کی پرواہ کیے بغیر اپنی ڈیوٹی پر حاضر رہیں۔اس سے بچأو اور امدادی کام بروقت اور مؤثر طریقے سے کیے جاسکیں گے ۔
مسٹر سنہا نے کہا کہ پی ڈبلیو ڈی، پانی کے شعبے اور بجلی کا محکمہ فوری طور پر اپنی خدمات بحال کریں۔سڑکیں، بجلی، پانی اور دیگر بنیادی سہولیات متاثرہ علاقوں میں وقت پر دستیاب ہوں۔تمام محکمے یہ بھی یقینی بنائیں کہ اشیاء اور ضروری خدمات لوگوں تک آسانی سے پہنچیں۔تمام ٹیلی کام کمپنیوں کو ہدایت دی گئی ہے کہ وہ موبائل اور لینڈ لائن خدمات فوری طور پر بحال کریں اور مسلسل برقرار رکھیں۔اس سے سیلاب زدہ علاقوں میں لوگوں کا رابطہ برقرار رہے گا اور ہنگامی مدد آسانی سے پہنچ سکے گی۔
پنجاب میں مسلسل بارش اور سیلاب کے مد نظر، مرکزی وزیر زراعت شیوراج سنگھ چوہان کل جمعرات کو ریاست کا دورہ کریں گے ، یہ اطلاع انہوں نے اپنے سوشل میڈیا اکاؤنٹ پر شیئر کی ہے ۔
اس کے ساتھ ہی اے اے پی کے قائد اروِند کیجریوال آج پنجاب کے دورے پر آنے والے ہیں۔ یہاں وہ سیلاب سے خراب صورتحال اور جاری راحت اور بچاؤکاموں کا جائزہ لیں گے ۔
مرکزی وزیر شیوراج سنگھ چاہان جمعرات کو پنجاب کے سیلاب زدہ علاقوں کا دورہ کریں گے ۔ انہوں نے بدھ کی صبح پنجاب کے وزیر اعلیٰ بھگونت سنگھ مان، گورنر گلاب چند کٹاریہ اور زراعت کے وزیر سے ٹیلی فون پر گفتگو کی ہے ۔ مرکزی وزیر جمعرات کی صبح امرتسر پہنچیں گے ، اس کے بعد سیلاب زدہ علاقے کا دورہ کریں گے اور واپس آ کر اعلیٰ سطحی میٹنگ کریں گے ۔