آئی پی ایل 2026 سے پہلے راہل دراوڑ اور راجستھان رائلز کی راہیں جدا

جے پور، 30 اگست (یو این آئی) راہل دراوڑ نے آئی پی ایل 2026 سے پہلے راجستھان رائلز (آر آر) کو چھوڑ دیا ہے۔ فرنچائزی نے ان کے شاندار تعاون کے لئے شکریہ ادا کیا اور کہا کہ انہیں ایک بڑا عہدہ پیش کیا گیا تھا لیکن انہوں نے قبول نہیں کیا۔
بطور کھلاڑی دراوڑ2011 میں آر آر کے ساتھ جڑے تھے۔ بعد ازاں وہ کوچ اور مینٹور کے طور پر بھی خدمات انجام دیتے رہے۔
فرنچائز نے اپنے بیان میں دراوڑ کی خدمات کو سراہتے ہوئے کہا کہ انہیں ایک بڑی ذمہ داری کی پیشکش کی گئی تھی لیکن انہوں نے اسے قبول نہیں کیا۔
راجستھان رائلز نے کہا، "راہل دراوڑ کا ٹیم کے ساتھ ایک طویل اور گہرا رشتہ رہا ہے۔ انہوں نے کئی برسوں تک ٹیم کی رہنمائی کی۔ ان کی قیادت میں ایک نئی نسل کے کھلاڑی تیار ہوئے۔ ”
آئی پی ایل 2025 کا سیزن دراوڑ کے لئے ذاتی طور پر بھی مشکل رہا تھا۔ وہ پاؤں کی چوٹ کے باعث کافی عرصہ وہیل چیئر پر رہے، تاہم ٹیم کی کوچنگ جاری رکھی۔ اس سیزن میں ان کی کوچنگ میں آر آر نے 14 میں سے صرف 4 میچ جیتے اور نویں مقام پر رہی۔
بطور کھلاڑی دراوڑ 2011 میں راجستھان رائلز سے جڑے تھے۔ 2012 اور 2013 میں بطور کھلاڑی کھیلنے کے بعد وہ 2014 اور 2015 میں مینٹور کے طور پر بھی ٹیم سے وابستہ رہے۔ آر آر کے ساتھ علیحدگی کے بعد اب نہ راجستھان رائلز کے پاس اور نہ ہی کولکاتا نائٹ رائیڈرز (کے کے آر) کے پاس کوئی ہیڈ کوچ ہے۔ پچھلے ماہ چندرکانت پنڈت بھی کے کے آر سے الگ ہوگئے تھے۔
فی الحال آر آر کے پاس کمار سنگاکارا بطور ڈائریکٹر آف کرکٹ، وکرم راٹھور بطور بیٹنگ کوچ اور شین بونڈ بطور بولنگ کوچ موجود ہیں۔ 2008 کے بعد سے راجستھان رائلز نے کوئی آئی پی ایل ٹرافی نہیں جیتی ہے۔ ان کی دوسری سب سے بڑی کامیابی 2022 میں آئی جب وہ گجرات ٹائٹنز کے خلاف فائنل میں پہنچے لیکن ہار گئے۔