نئی دہلی، 30 اگست (یو این آئی) بھارتی اوپنر شبھمن گل ایشیا کپ سے قبل فٹنس ٹیسٹ دینے کے لئے بنگلورو میں واقع نیشنل کرکٹ اکیڈمی کے سینٹر آف ایکسیلنس پہنچ گئے ہیں۔ جمعہ (29 اگست) کی شام وہ اس لازمی معائنے کے لئے بنگلورو روانہ ہوئے جو ایشیا کپ جانے والے تمام کھلاڑیوں کے لئے ضروری ہے۔
یہ ابھی واضح نہیں ہے کہ گل بی سی سی آئی کے اس مرکز میں فٹنس ٹیسٹ کب دیں گے، لیکن امکان ہے کہ اگلے چند دنوں میں فٹنیس ٹیسٹ مکمل ہوگا اور اس کے بعد وہ براہ راست یو اے ای روانہ ہوں گے۔
حال ہی میں گل کی طبیعت ناساز رہی تھی اور وہ چنڈی گڑھ میں آرام کر رہے تھے، اسی وجہ سے وہ دلیپ ٹرافی کی انٹر زونل ریڈ بال ٹورنامنٹ میں حصہ نہیں لے سکے۔ صحت یاب ہونے کے بعد انہوں نے اپنے آبائی شہر میں چند دنوں تک مشق کی اور پھر بنگلورو روانہ ہوگئے۔
دوسری جانب، ہندوستانی ٹیم 4 ستمبر کو دبئی میں جمع ہوگی۔ کھلاڑی اپنے اپنے مراکز سے پرواز کریں گے اور پہلے پریکٹس سیشن کے لئے وقت پر دبئی پہنچیں گے۔ ٹیم مینجمنٹ نے پہلا نیٹ سیشن 5 ستمبر کو رکھنے کا منصوبہ بنایا ہے۔ اگرچہ مقام طے نہیں ہوا ہے لیکن قوی امکان ہے کہ یہ دبئی کی آئی سی سی اکیڈمی میں ہوگا، جہاں ہندوستانی ٹیم نے سال کے آغاز میں چیمپئنز ٹرافی کے دوران کامیاب تیاری کی تھی۔
حال ہی میں انگلینڈ میں ٹیسٹ سیریز مکمل کرنے کے بعد ہندوستانی ٹیم ٹی 20 فارمیٹ میں زیادہ مشق نہیں کر سکی ہے۔ اس کے برعکس باقی تمام ٹیموں نے اپنی تیاری شروع کر دی ہے۔ پاکستان، افغانستان اور یو اے ای شارجہ میں سہ فریقی سیریز کھیل رہے ہیں۔ سری لنکا اس وقت زمبابوے میں دو ون ڈے اور تین ٹی 20 میچوں کی سیریز کھیل رہا ہے، جبکہ بنگلہ دیش نے حال ہی میں پاکستان کے خلاف ٹی 20 سیریز کھیلی ہے۔ اومان اور ہانگ کانگ بھی پہلے ہی یو اے ای پہنچ چکے ہیں اور پریکٹس میچ کھیل رہے ہیں۔
ایشیاء کپ 9 ستمبر سے شروع ہوگا اور ہندوستان اپنا پہلا میچ 10 ستمبر کو یو اے ای کے خلاف کھیلے گا۔
