ریکھا گپتا نے طلباء کے لیے یو-اسپیشل بسوں کا آغاز کیا

نئی دہلی، 28 اگست (یو این آئی) دہلی کی وزیر اعلیٰ ریکھا گپتا نے جمعرات کوبرسوں سے بند طلباء کے لیے یو اسپیشل بسوں کا آغاز کیا۔
محترمہ ریکھا گپتا اور وزیر ٹرانسپورٹ ڈاکٹر پنکج سنگھ نے ڈی یو کیمپس سے اس بس سروس کو جھنڈی دکھا کر روانہ کیا۔ انہوں نے کہا’’آج، میں نے دہلی یونیورسٹی اسپورٹس کمپلیکس سے یو اسپیشل ای وی بس سروس کا افتتاح کیا۔ برسوں سے بندیہ سروس اب دہلی یونیورسٹی کے طلباء کے لیے دوبارہ شروع کر دی گئی ہے۔‘‘
وزیراعلیٰ نے کہا کہ جب میں نے یونیورسٹی چھوڑی تھی اس وقت یہ یو اسپیشل میرے کالج کے دنوں کی سب سے میٹھی یادیں اپنے ساتھ لے گئی، آج جب میں آپ کے درمیان واپس آئی ہوں تو اپنے ساتھ اے سی، ایف ایم ریڈیو، پینک بٹن اور جدید ترین سہولیات سے آراستہ یو اسپیشل بھی لائی ہوں، صرف چھ ماہ میں حکومت نے آپ کے ایک ایک ووٹ کی طاقت کو آپ کے لئے سہولت میں تبدیل کردیا ہے۔
انہوں نے کہا کہ ’یہ صرف ایک بس کی نہیں بلکہ دوستی، گپ شپ اور قہقہوں کی چلتی پھرتی دنیا ہے، جہاں ہم کبھی سیڑھیوں پر بیٹھ کر انتاکشری کھیلا کرتے تھے، آج آپ ایف ایم سنیں گے لیکن احساسات وہی رہیں گے۔
انہوں نے کہا کہ اب یہ یو اسپیشل آپ کو کالج کے گیٹ سے آپ کے گھر تک بحفاظت اور سہولت سے لے جائے گی۔ ہماری حکومت طلباء کے لیے میٹرو پاس پر بھی کام کر رہی ہے، تاکہ تعلیم اور سفر دونوں آرام دہ ہوں۔