سی پی آئی کے وفد کی الیکشن کمشنروں سے ملاقات

نئی دہلی، 28 اگست (یو این آئی) کمیونسٹ پارٹی آف انڈیا (سی پی آئی) کے جنرل سکریٹری ڈی راجہ کی قیادت میں ایک وفد نے جمعرات کو یہاں الیکشن کمیشن کے دفتر میں الیکشن کمیشن کمشنروں سے ملاقات کی اور مختلف مسائل پر تبادلہ خیال کیا۔
الیکشن کمیشن سے موصولہ اطلاع کے مطابق سی پی آئی جنرل سکریٹری کی قیادت میں وفد نے چیف الیکشن کمشنر گیانیش کمار اور الیکشن کمشنرز ڈاکٹر سکھبیر سنگھ سندھو اور ڈاکٹر وویک جوشی سے ملاقات کی اور مختلف مسائل پر اپنی تجاویز دیں۔
کمیشن کے ساتھ یہ ملاقات مختلف قومی اور ریاستی سطح کی سیاسی جماعتوں کے قائدین کے ساتھ جاری بات چیت کا تسلسل ہے۔ کمیشن نے تمام اسٹیک ہولڈرز کے ساتھ موجودہ قانونی فریم ورک کے مطابق انتخابی عمل کو مضبوط بنانے کے مقصد سے یہ اقدام اٹھایا ہے۔
کمیشن نے بتایا کہ گزشتہ 150 دنوں کے دوران کل 4719 آل پارٹی میٹنگز ہوئیں جن میں چیف ایگزیکٹو آفیسرز کی 40 میٹنگز، ڈسٹرکٹ الیکشن آفیسرز کی 800 میٹنگز اور الیکشن آفیسرز کی 3879 میٹنگز شامل ہیں، جس میں مختلف سیاسی جماعتوں کے 28 ہزار سے زائد نمائندوں نے شرکت کی۔ الیکشن کمیشن نے اس سال مئی سے اب تک پانچ تسلیم شدہ قومی جماعتوں اور 17 ریاستی سطح کی جماعتوں سے ملاقات کی ہے۔ کمیشن نے کہا کہ باقی جماعتوں سے بات چیت کا عمل جاری ہے۔