یو ایس سینٹرز فار ڈیزیز کنٹرول اینڈ پریوینشن کی ڈائریکٹر سوزان موناریز برخاست، چار اہلکار مستعفی

وائٹ ہاوس نے بدھ کے روز دیر گئے یو ایس سینٹرز فار ڈیزیز کنٹرول اینڈ پریوینشن (سی ڈی سی) کی ڈائریکٹر سوزان موناریز کو تنازعہ کے بعد برطرف کر دیا۔ انہوں نے سکریٹری صحت رابرٹ ایف کینیڈی جونیئر کے کہنے پر اپنے عہدے سے استعفیٰ دینے سے انکار کر دیا تھا۔ متعدی امراض کی محقق ڈاکٹر موناریز کو کینیڈی نے ایک ماہ قبل ہی حلف دلایا تھا۔
نیویارک ٹائمز نے اس تنازعے پر اپنی رپورٹ میں کہا ہے کہ ڈاکٹر موناریز کا کینیڈی کے ساتھ ویکسین کی پالیسی پر حالیہ تنازعہ ہوا تھا۔ سینیٹ بھی ڈاکٹر موناریز کی تقرری کی تصدیق کر چکی ہے۔ پچھلے ڈائریکٹرز کے ساتھ ایسا کبھی نہیں ہوا، اس لیے وہ صدر کی مرضی پر منحصر رہے۔ سینیٹ کی توثیق کی وجہ سے، کینیڈی کے پاس انہیں ہٹانے کا اختیار نہیں تھا۔ دن بھر کی اس پیش رفت پر ڈاکٹر سوزان موناریز کے وکلاءنے شام کو اصرار کیا کہ وہ یہیں رہیں گی۔ لیکن رات 9:30بجے صدر ڈونلڈ جے ٹرمپ کے ترجمان کش دیسائی نے ایک ای میل پیغام کا اشتراک کرکے کہا کہ ڈاکٹر موناریز کو برطرف کر دیا گیا ہے۔
ڈاکٹر موناریز کے وکلاء، مارک ایس زید اور ایبی لوئیل نے ایک بیان میں کہا کہ ڈاکٹر موناریز کی صورت حال ایک بڑے مسئلے کی علامت ہے۔ زید اور لوئیل نے لکھا، ”یہ صحت عامہ کے اداروں کو تباہ کرنے کی ایک منظم سازش ہے۔ ڈاکٹر موناریز پر حملہ ہر امریکی کے لیے ایک انتباہ ہے۔“ کینیڈی اور ڈاکٹر موناریز کے درمیان کئی دنوں سے جاری تنازعہ بدھ کو منظر عام پر آیا۔ دوپہر کے وقت، محکمہ صحت اور انسانی خدمات نے ایکس پر اعلان کیا کہ ڈاکٹر موناریز اب سی ڈی سی کے ڈائریکٹر نہیں ہیں۔ اس کے چند گھنٹوں بعد، وکلاءلوئیل اور زید نے محکمے کے بیان پر اعتراض کرتے ہوئے کہا کہ ڈاکٹر موناریز نے ”نہ تو استعفیٰ دیا ہے اور نہ ہی وائٹ ہاوس سے برطرفی کا نوٹس موصول ہوا ہے۔ ایک دیانت دار اور سائنس کے لیے پرعزم ہونے کے ناطے وہ استعفیٰ نہیں دیں گی۔“
واقعات کے اس ڈرامائی موڑ کے بعد، سی ڈی سی کے چیف میڈیکل آفیسر ڈاکٹر ڈیبرا ہووری، ڈاکٹر ڈیمیٹرے ڈسکلاکیس، ڈاکٹر ڈینیئل جرنیگن اور ڈاکٹر جینیفر لیڈن نے اپنے عہدوں سے استعفیٰ دے دیا۔ ڈاکٹر ڈسکلاکیس نے اپنے ساتھیوں کو ایک ای میل میں لکھا، ”صحت عامہ کے مسلسل تنازعہ کا شکار ہونے کی وجہ سے، میں اب اس کردار میں خدمات انجام دینے کے قابل نہیں ہوں۔“ ڈاکٹر جرنیگن اینتھراکس، سوائن فلو اور کووڈ کے وقت ایجنسی کے رہنما رہے ہیں۔ ڈاکٹر ڈسکلاکیس نے ایمپوکس کی وبا سے نمٹنے میں ملک کی مدد کی ہے۔ ڈاکٹر لیڈن نے کووڈ اسٹریٹجک سائنس یونٹ قائم کیا اور ڈاکٹر ہووری نے ایجنسی کا اوپی اوئڈ پروگرام بنایا۔