ہند-فرانس اسٹریٹجک شراکت داری کو مزید مستحکم بنانے کے طریقوں پرمودی۔ میکرون کے مابین تبادلہ خیال

فرانس کے صدر میکرون کی جانب سے وزیر اعظم نریندر مودی سے ٹیلی فون پر با ت چیت
نئی دہلی، 21اگست(یو این آئی)آج وزیرِاعظم نریندر مودی کو جمہوریہ فرانس کے صدر ایمانوئل میکرون کی جانب سے ایک ٹیلیفون کال موصول ہوئی۔دونوں رہنماؤں نے یوکرین اور مغربی ایشیامیں جاری تنازعات کے پرامن حل کے لیے کی جانے والی کوششوں پر تبادلہ خیال کیا۔
صدر میکرون نے واشنگٹن میں یورپ، امریکہ اور یوکرین کے رہنماؤں کے درمیان حالیہ ملاقاتوں پر اپنا تجزیہ پیش کیا اور غزہ کی موجودہ صورتحال کے حوالے سے بھی اپنے خیالات سے آگاہ کیا۔
وزیرِاعظم نریندر مودی نے ان تنازعات کے پرامن حل اور امن و استحکام کی جلد بحالی کے لیے ہند کی مستقل حمایت کا اعادہ کیا۔
رہنماؤں نے دوطرفہ تعاون کے ایجنڈے میں پیش رفت کا جائزہ لیا، جس میں تجارت، دفاع، سول نیوکلیئر تعاون، ٹیکنالوجی اور توانائی کے شعبے شامل تھے ۔ دونوں نے ہند-فرانس اسٹریٹجک شراکت داری کو مزید مضبوط بنانے کے اپنے مشترکہ عزم کو دہرایا اور سال 2026 کو ‘سالِ اختراع ‘ (ایئر آف اننوویشن) کے طور پر شایانِ شان طریقے سے منانے پر اتفاق کیا۔
صدر میکرون نے ہندوستان اور یورپی یونین کے درمیان آزاد تجارتی معاہدے (ایف ٹی اے )کی جلد تکمیل کے لیے اپنی حمایت کا بھی اظہار کیا۔
دونوں رہنماؤں نے تمام اہم امور پر رابطے میں رہنے پر اتفاق کیا۔