راہل گاندھی نے جب بھی یاترا کی، جمہوریت نے کروٹ لی: کانگریس

نئی دہلی، 16 اگست (یو این آئی) کانگریس نے کہا ہے کہ جب بھی پارٹی کے سابق صدر اور لوک سبھا میں اپوزیشن لیڈر راہل گاندھی نے یاترا شروع کی، ملک میں جمہوریت نے کروٹ لی ہے اور اس بار بہار میں ووٹر ادھیکار یاترا شروع کی جا رہی ہے ، اس لیے وہاں بھی تبدیلی آئے گی۔
کانگریس کے شعبہ ابلاغیات کے سربراہ پون کھیڑا نے ہفتہ کے روز یہاں پارٹی کے صدر دفتر میں منعقدہ پریس کانفرنس میں کہا کہ مسٹر راہل گاندھی کی ووٹر ادھیکار یاترا اتوار سے بہار کے سہسرام سے شروع ہو رہی ہے ، جو 16 دنوں میں 1300 کلومیٹر کا فاصلہ طے کرے گی۔ انہوں نے کہا کہ یہ بہار میں تبدیلی کا باعث بنے گی۔ انہوں نے لوگوں سے اپیل کی کہ وہ بڑی تعداد میں یاترا میں شامل ہوں۔
مسٹر پون کھیڑا نے کہا، "جب بھی راہل گاندھی جی یاترا کے لیے نکلے ہیں، اس ملک کی جمہوریت نے کروٹ لی ہے ۔ ‘ووٹر ادھیکار یاترا’ ایک تاریخی پہل ہوگی۔ یہ یاترا ہم سب کے وجود کی لڑائی میں سنگ میل ثابت ہوگی۔” انہوں نے کہا کہ بہار میں کل سے شروع ہونے والی یاترا لوگوں کو بیدار کرنے کی یاترا ہے ، کیونکہ سازش کرنے والے باز نہیں آئیں گے ، وہ ووٹ چوری کرنے کی کوشش کریں گے ۔
کانگریس کے ترجمان نے کہا کہ ‘ووٹر ادھیکار یاترا’ بہار کے سہسرام سے 17 اگست کو شروع ہو رہی ہے ۔ انہوں نے کہا کہ 16 روزہ یاترا یکم ستمبر کو پٹنہ میں بہت بڑی ریلی کے ساتھ ختم ہو گی اور انڈیا اتحاد کے رہنما اس میں شرکت کریں گے ۔ یہ یاترا ‘ایک شخص ایک ووٹ’ کے حق کے واسطے لڑنے کے لیے نکالی جا رہی ہے ۔
انہوں نے کہا کہ آزاد ہندوستان میں آزادی سے سانس لینا صرف اس لیے ممکن ہے کہ ہمارے پاس ووٹ کی طاقت ہے ۔ مسٹر راہل گاندھی نے لڑائی شروع کی ہے تاکہ ملک کا ہر شہری آزادی سے سانس لے سکے ۔ مسٹر پون کھیڑا نے کہا کہ جس طرح جعلی ووٹ جوڑنے اور کاٹنے کا کھیل چل رہا ہے ، اس میں بھارتیہ جنتا پارٹی کے لوگ رنگے ہاتھوں پکڑے گئے ہیں۔ اب تو عام شہری بھی ووٹ چوری کا ثبوت دے رہے ہیں۔
مسٹر پون کھیڑا نے کہا، "جب ہمارے انڈیا الائنس کے ساتھیوں اور سماجی کارکنوں نے مل کر اپیل کی تو سپریم کورٹ کو بھی مداخلت کرنی پڑی۔ یہ سازش صرف ووٹ چھیننے کی نہیں تھی، یہ آپ کی اور ہماری شناخت چھیننے کی سازش تھی۔”
انہوں نے کہا کہ آج دلتوں، پسماندہ طبقوں، مظلوموں، استحصال زدہ طبقوں اور اقلیتوں کو اپنے حق رائے دہی سے محروم کیا جا رہا ہے ، کل ان کی شراکت داری چھین لی جائے گی۔ اس ملک کے غریب طبقے پر حملہ کرنے کی سازش رچی جارہی تھی، جس کے خلاف ملک کے عوام نے آواز اٹھائی ہے