وزیر اعظم مودی نے دیویا دیشمکھ کو تاریخی جیت پر مبارکباد پیش کی

نئی دہلی// وزیر اعظم نریندر مودی نے ہندوستانی شطرنج کھلاڑی دیویا دیشمکھ کو 2025 فیڈے ویمنز ورلڈ کپ میں ان کی شاندار کامیابی پر مبارکباد دی ہے، جہاں انہوں نے نہ صرف ایک باوقار خطاب اپنے نام کیا بلکہ گرینڈ ماسٹر کا خطاب بھی حاصل کیا وزیراعظم نے سوشل میڈیا پلیٹ فارم ایکس پر لکھا کہ ہندوستانی شطرنج کے لیے آج کا دن غیر معمولی رہا۔ دیویا دیشمکھ نے نہ صرف 2025 فیڈے ویمنز ورلڈ کپ جیتا ہے بلکہ وہ گرینڈ ماسٹر بھی بنی ہیں۔ انہیں دل کی گہرائیوں سے مبارکباد۔ ان کی یہ کامیابی کئی لوگوں کے لیے باعث تحریک بنے گی اور شطرنج کو نوجوانوں میں مزید مقبول بنانے میں مدد دے گی۔
19 سالہ دیویا دیشمکھ نے کل جارجیا کے شہر بٹومی میں منعقدہ ایک سنسنی خیز فائنل میں تجربہ کار کھلاڑی کونیرو ہمپی کو شکست دی۔ اس کامیابی کے ساتھ وہ فیڈے ویمنز ورلڈ کپ جیتنے والی پہلی ہندوستانی خاتون اور گرینڈ ماسٹر کا خطاب حاصل کرنے والی چوتھی ہندوستانی کھلاڑی بھی بن گئیں ہیں۔