انگلینڈ کو بڑا جھٹکہ، کپتان بین اسٹوکس آخری ٹیسٹ سے باہر، انگلینڈ 4 تبدیلیوں کے ساتھ اوول کے میدا میں اترے گا

نئی دہلی//
انگلینڈ کے کپتان بین اسٹوکس بھارت کے خلاف پانچویں اور آخری ٹیسٹ میچ سے باہر ہو گئے ہیں۔ اسٹوکس کو کندھے کی انجری ہے۔ بھارت اور انگلینڈ کے درمیان آخری ٹیسٹ میچ جمعرات (31 جولائی) سے کیننگٹن اوول میں کھیلا جائے گا۔ انگلینڈ نے پانچویں ٹیسٹ میچ کے لیے اپنی پلیئنگ الیون کا اعلان کر دیا ہے۔ میزبان نے پلیئنگ الیون میں 4 تبدیلیاں کی ہیں۔ اسٹوکس اپنے دائیں کندھے میں چوٹ کی وجہ سے نہیں کھیل پائیں گے جب کہ اسپنر لیام ڈاسن اور فاسٹ بولر جوفرا آرچر کے ساتھ تیز گیند باز برائیڈن کارس بھی آخری ٹیسٹ میچ سے باہر ہو گئے ہیں۔
انگلینڈ نے آخری ٹیسٹ میچ کے لیے جیکب بیتھل کو شامل کیا ہے جو چھٹے نمبر پر بیٹنگ کریں گے۔ سرے کے گیند باز گس اٹکنسن اور جیمی اوورٹن کے ساتھ ناٹنگھم شائر کے فاسٹ بولر جوش ٹنگ بھی ٹیم میں شامل ہیں۔ بھارت اور انگلینڈ کے درمیان 5 میچوں کی سیریز میں میزبان انگلینڈ 2-1 سے آگے ہے۔ اس کا مقصد آخری ٹیسٹ جیت کر سیریز جیتنا ہے جبکہ بھارت برابری کے ارادے سے میدان میں اترے گا۔
یہ انگلینڈ کے لیے بڑا دھچکہ ہے۔ کیونکہ اس ان فارم اسٹار کو تیسرے اور چوتھے ٹیسٹ میں آل راؤنڈ کارکردگی پر پلیئر آف دی میچ قرار دیا گیا تھا۔ اسٹوکس نے بھارت کے خلاف موجودہ سیریز کے 4 ٹیسٹ میچوں میں 304 رنز بنائے ہیں جس میں مانچسٹر میں بنائی گئی سنچری بھی شامل ہے۔ انہوں نے 25.24 کی اوسط سے 17 وکٹیں بھی حاصل کیں، جو اس سیریز میں کسی بھی باؤلر کی جانب سے لی گئی سب سے زیادہ وکٹیں ہیں، جس میں ایک بار اننگز میں پانچ وکٹیں بھی شامل ہیں۔