سرینگر//
منشیات کے خلاف مہم کو جاری رکھتے ہوئے پولیس نے جنوبی کشمیر کے ضلع اننت ناگ میں الگ الگ کارروائیوں کے دوران دو منشیات فروشوں کو گرفتار کرکے ان کی تحویل سے بھاری مقدار میں ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بجبہاڑہ کی ایک ٹیم نے دوپت یار کراسنگ کے نزدیک معمول کے ناکے پر ایک مشتبہ شخص کو روکا۔
ترجمان نے کہا کہ تلاشی کے دوران اس کی تحویل سے قریب ایک کلو چرس پائوڈر جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت محمد یوسف میر ولد غلام احمد میر ساکن دوپت یار کے طور پر ہوئی ہے ۔ان کا کہنا تھا کہ اسی طرح کے ایک اور کارروائی کے دوران پولیس پوسٹ سنگم کی ایک ٹیم نے نٹی پورہ سنگم بنڈ پر ایک ناکے کے دوران ایک شخص کو نٹی پورہ سے قومی شاہراہ کی طرف آتے ہوئے دیکھا جس نے ایک پالیتیھن کا ایک بیگ اٹھایا تھا۔
پولیس ترجمان نے بتایا کہ اس شخص نے پولیس کو دیکھ کر موقع سے فرار ہونے کی کوشش کی تاہم اس کو موقع پر ہی دھر لیا گیا۔انہوں نے کہا کہ تلاشی کے دوران اس کی تحویل سے۲۹۰ء۱کلو چرس جیسا ممنوعہ مواد بر آمد کیا گیا جس کے بعد اس کو گرفتار کیا گیا۔
گرفتار شدہ کی شناخت منظور احمد ڈار ولد ولی محمد ڈار ساکن نٹی پورہ سنگم کے طور پر کی گئی ہے ۔بیان میں کہا گیا کہ اس ضمن میں این ڈی پی ایس ایکٹ کے تحت مقدمے درج کرکے مزید تحقیقات شروع کی گئی۔انہوں نے کہا کہ اننت ناگ پولیس معاشرے سے منشیات کی بیخ کنی کے لئے پر عزم ہے ۔
