سرینگر//
پائین شہر کے گنجان آبادی والے علاقے خانقاہ سوختہ نوا کدل میں اتوار اور پیر کی درمیانی شب کو ایک ہولناک آتشزدگی میں کم از کم چار رہائشی مکانات خاکستر ہوگئے ، جبکہ آگ بجھانے کی کارروائی کے دوران ایک فائر مین زخمی ہوا ہے ۔
فائر اینڈ ایمرجنسی سروسز کے ایک سینئر افسر نے یو این آئی کو بتایا کہ رات تقریباً تین بجے ایک رہائشی مکان سے اچانک آگ بھڑک اٹھی، جو تیزی کے ساتھ پھیل کر اس کے ساتھ متصل تین مزید مکانوں کو اپنی لپیٹ میں لے لیا۔
انہوں نے بتایا کہ اطلاع ملتے ہی فائرسروس کے اہلکار سات فائر ٹینڈروں کے ساتھ جائے حادثہ پر پہنچے اور فوری طور پر آگ بجھانے کی کارروائی شروع کی۔
ان کا مزید کہنا تھا کہ علاقے کی گنجان آبادی، تنگ گلیاں اور پرانے طرز تعمیر کے مکانات نے کارروائی کو مشکل بنا دیا۔ تاہم، انتھک محنت کے بعد آگ کو مزید پھیلنے سے روک دیا گیا۔
آگ بجھانے کے دوران ایک فائر مین، جس کی شناخت نصیر احمد کے طور پر کی گئی ہے ، زخمی ہوا جس سے علاج ومعالجہ کی خاطر نزدیکی ہسپتال منتقل کیا گیا۔
پولیس نے واقعے کا سنجیدگی سے نوٹس لیتے ہوئے آگ لگنے کی وجوہات کا پتہ لگانے کے لیے مقدمہ درج کر لیا ہے اور تفتیشی عمل شروع کر دیا گیا ہے ۔
عینی شاہدین نے بتایا کہ آگ کی شدت اتنی زیادہ تھی کہ کئی رہائشی افراد اپنی جان بچا کر مشکل سے گھروں سے نکل پائے ۔ مقامی افراد کے مطابق متاثرہ خاندانوں کا زبردست مالی نقصان ہوا ہے اور فوری امداد کی ضرورت ہے ۔
دریں اثنا، فائر اینڈ ایمرجنسی ذرائع نے مزید انکشاف کیا کہ گزشتہ ۲۴گھنٹوں کے دوران وادی کشمیر کے مختلف علاقوں میں آگ کی متعدد وارداتیں رپورٹ ہو چکی ہیں جن میں مجموعی طور پر دس رہائشی مکانات اور چار دکانیں مکمل طور پر خاکستر ہو چکی ہیں۔
