سرینگر//
منشیات کا کاروبار کرنے والوں کے خلاف اپنی مہم جاری رکھتے ہوئے سرینگر پولیس نے ایک اہم کارروائی کے دوران این ڈی پی ایس ایکٹ کے تحت تقریباً۵ء۱کروڑ روپے مالیت کی رہائشی جائیداد کو ضبط کر لیا ہے ۔
پولیس کے ایک ترجمان نے بتایا کہ ضبط کی گئی جائیداد میں دو منزلہ رہائشی مکان اور ایک کنال چار مرلہ زمین شامل ہے ، جو گلزار احمد بٹ ولد مرحوم عبد الرحمان بٹ ساکن بڈو باغ خانیار، سرینگر کے نام پر درج ہے ۔
مذکورہ جائیداد اس وقت ان کے بیٹے سہیل احمد بٹ کے قبضے میں ہے ، جو ایک بدنام زمانہ منشیات فروش ہے اور پولیس تھانہ خانیار میں ایف این ڈی پی ایس ایکٹ کے تحت درج مقدمے میں ملوث ہے ۔
پولیس کا کہنا ہے کہ سہیل احمد بٹ کا ماضی منشیات کی اسمگلنگ سے جڑا رہا ہے اور وہ مقامی نوجوانوں کو نشے کی لت میں مبتلا کرنے میں سرگرم رہا ہے ، جو کہ عوامی صحت اور سماجی تحفظ کے لیے ایک سنگین خطرہ ہے ۔
پولیس بیان کے مطابق تحقیقات سے یہ بات سامنے آئی ہے کہ مذکورہ جائیداد غیر قانونی منشیات کی تجارت سے حاصل کی گئی آمدنی سے خریدی گئی ہے ۔ چنانچہ این ڈی پی ایس ایکٹ کی متعلقہ دفعات کے تحت قانونی کارروائی عمل میں لاکر اس جائیداد کو ضبط کر لیا گیا ہے ۔
پولیس کے مطابق اب یہ جائیداد نہ بیچی جا سکتی ہے ، نہ کسی کو منتقل کی جا سکتی ہے ، جب تک کہ مجاز اتھارٹی سے باقاعدہ اجازت نہ لی جائے ۔
یہ کارروائی جموں و کشمیر پولیس کی اس حکمت عملی کا حصہ ہے جس کا مقصد منشیات فروشوں کے مالی ڈھانچے کو توڑنا اور نوجوان نسل کو نشے کی لعنت سے بچانا ہے ۔
سرینگر پولیس نے عوام سے اپیل کی ہے کہ وہ منشیات کے خلاف جنگ میں سرگرم حصہ لیں اور کسی بھی مشتبہ سرگرمی کی اطلاع فوری طور پر پولیس کو دیں۔ پولیس نے کہا ہے کہ عوامی تعاون ہی ایک منشیات سے پاک اور محفوظ معاشرہ قائم کرنے کی بنیاد بن سکتا ہے ۔
دریں اثنا بڈگام پولیس نے این ڈی پی ایس ایکٹ کے تحت نصراللہ پورہ میں ۲۵ لاکھ روپے کی جائیداد ضبط کی ہے ، جو بدنام زمانہ پیڈلر پرویز احمد ڈار عرف پری پنجابی سے منسلک ہے۔
یہ کارروائی ایف آئی آر نمبر۲۷۱/۲۰۲۲پولیس اسٹیشن بڈگام میں این ڈی پی ایس ایکٹ کی متعلقہ دفعات کے تحت درج کیا گیا۔
منسلک پراپرٹی ، نصراللہ پورہ میں واقع پانچ دکانوں پر مشتمل سنگل لائن شاپنگ کمپلیکس کا تعلق پرویز احمد ڈار عرف پری پنجابی سے ہے ، جو محمد انور ڈار کا بیٹا ہے ، جو نصراللہ پورہ، بڈگام کا رہائشی ہے۔
اس میں لکھا گیا ہے کہ یہ اقدام بڈگام پولیس کی منشیات کی لعنت کے خلاف مسلسل مہم کا حصہ ہے ، جس کا مقصد منشیات کے اسمگلروں کے مالیاتی نیٹ ورک کو ختم کرنا ہے۔
بیان میں کہا گیا ہے کہ عوام پر زور دیا جاتا ہے کہ وہ اپنے علاقے میں منشیات کی فروخت یا اسمگلنگ سے متعلق کسی بھی معلومات کی اطلاع دے کر پولیس کی مدد کریں۔
