سرینگر//
پولیس کے نام پر عام شہری سے لاکھوں روپے کی رقم بٹورنے والے ایک شخص کو سوپور پولیس نے گرفتار کر لیا ہے ۔
گرفتار شدہ شخص کی شناخت شہزاد احمد ڈار ولد مرحوم محمد رمضان ڈار ساکن ڈانگر پورہ سوپور کے بطور کی گئی ہے ۔
پولیس کے مطابق، مذکورہ شخص نے خود کو پولیس سے قریبی تعلق رکھنے والا ظاہر کرتے ہوئے ایک مقامی شہری کو ایک زیر التوا معاملے میں مدد فراہم کرنے کی جھوٹی یقین دہانی دی اور۹۵ہزار روپے وصول کیے ۔ بعد ازاں جب معاملے میں کوئی پیش رفت نہ ہوئی تو متاثرہ شہری نے پولیس سے رجوع کیا، جس کے بعد تھانہ سوپور میں ایف آئی آر نمبر۲۰۲۵/۱۳۴کے تحت کیس درج کر کے تفتیش شروع کی گئی۔
پولیس حکام نے عوام کو خبردار کیا ہے کہ وہ ایسے فریب دینے والے عناصر سے ہوشیار رہیں اور کسی بھی پولیس کارروائی میں ثالثی یا مدد کے نام پر کسی کو رقم نہ دیں۔
پولیس کا کہنا ہے کہ قانون کے دائرے میں رہتے ہوئے ہی تمام معاملات حل کیے جاتے ہیں، اور ایسے دھوکہ دہی میں ملوث افراد کے خلاف سخت قانونی کارروائی کی جائے گی۔
پولیس نے مزید اپیل کی ہے کہ اگر کسی بھی شہری کو پولیس کے نام پر دھمکی دی جائے یا رقم طلب کی جائے تو وہ بلا تاخیر قریب ترین تھانے یا ضلع پولیس دفتر سے رابطہ قائم کریں۔
