سی بی آئی کی خصوصی عدالت نے سائبر وصولی میں ملوث شخص کو ریمانڈ پر بھیج دیا

نئی دہلی// سنٹرل بیورو آف انوسٹی گیشن (سی بی آئی) کی خصوصی عدالت نے جمعہ کو بین الاقوامی سائبر وصولی کے سنڈیکیٹ سے وابستہ ایک مشتبہ شخص کو، جسے ایک دن پہلے گرفتار کیا گیا تھا، چار دن کے ریمانڈ پر بھیج دیا۔
سی بی آئی نے اس ملزم کو جمعرات کو ممبئی سے گرفتار کیا تھا۔ اس سے پہلے جانچ ایجنسی نے اس معاملے کی جانچ کے دوران بدھ کو احمد آباد اور ممبئی میں کئی مقامات پر مربوط تلاشی مہم چلائی تھی۔ تلاشی کے دوران ایجنسی نے کئی قابل اعتراض اشیاء برآمد کیں۔
یہ معاملہ ایک بین الاقوامی فراڈ نیٹ ورک سے متعلق ہے جو غیر ملکی شہریوں بالخصوص امریکی اور کینیڈین شہریوں کو سرکاری اہلکار ظاہر کر کے انہیں جھوٹے الزامات میں پھنسانے کی دھمکیاں دے کر رقم بٹورنے میں ملوث ہے ۔ کارروائی کے دوران ملزم کے پاس سائبر فراڈ میں استعمال ہونے والا ایک منظم سستم پایا گیا، جس میں ٹیلی کمیونیکیشن سیٹ اپ، پہلے سے تیار کردہ اسکیم اسکرپٹس، جعلی شناختی بیجز اور شناختی کارڈز شامل تھے جن کا دعویٰ تھا کہ وہ کینیڈا کے قانون نافذ کرنے والے افسران ہیں۔ اس کے علاوہ ملزم کے قبضے سے تقریباً 45,000 ڈالر مالیت کے ورچوئل ڈیجیٹل اثاثے ضبط کیے گئے ۔ کیس کی تفتیش جاری ہے ۔