ساتوک اور چراغ کی جوڑی سنگاپور بیڈمنٹن اوپن کے سیمی فائنل میں

سنگاپور// ہندوستان کے ساتوک سائی راج رنکی ریڈی اور چراغ شیٹی کی جوڑی نے جمعہ کے روز ملائیشیا کی گوہ سیفئی اور نور عزالدین کی جوڑی کو ہرا کر سنگاپور بیڈمنٹن اوپن 2025 میں مردوں کے ڈبلز کے سیمی فائنل میں جگہ بنا لی ہے ۔آج یہاں 39 منٹ تک جاری رہنے والے مردوں کے ڈبلز مقابلے میں ساتوک اور چراغ کی جوڑی نے دنیا کی نمبر ایک ملائیشین جوڑی گوہ سیفئی اور نور عزالدین کو سیدھے سیٹوں میں 21-17، 21-15 سے شکست دی۔گیم کے آغاز سے ہی دونوں جوڑیوں کے درمیان سخت مقابلہ دیکھنے کو ملا اور ایک وقت میں اسکور 7-7 پر برابر تھا۔ اس کے بعد ساتوک-چراغ نے کچھ شاندار شاٹس لگاتے ہوئے میچ پر اپنی گرفت مضبوط کرنا شروع کی اور اسکور کو 12-8 اپنے حق میں کر لیا۔ اس دوران ملائیشیائی جوڑی نے بھی کچھ پوائنٹس حاصل کیے اور اسکور کے فرق کو کم کرتے ہوئے اسے 16-15 کر دیا۔ اس کے بعد ہندوستانی جوڑی نے بغیر کوئی غلطی کیے پہلا گیم 21-17 سے جیت لیا۔دوسرے گیم کے آغاز میں بھی دونوں کھلاڑیوں کے درمیان سخت مقابلہ دیکھنے کو ملا اور اسکور 5-5 پر برابر چل رہا تھا۔ ساتوک اور چراغ نے پھر شاندار کھیل کا مظاہرہ کرتے ہوئے مڈ گیم بریک تک 11-7 کی اہم برتری حاصل کی۔ اس کے بعد ساتوک سائی راج رنکی ریڈی اور چراغ شیٹی نے اس گیم کو 21-15 سے جیت کر میچ اپنے نام کر لیا۔ساتوک اور چراغ کا سیمی فائنل میں مقابلہ دو بار کے اولمپک کانسی کے تمغہ جیتنے والے اور تیسرے سیڈ ملائیشیا کے آرون چیا اور سوہ ووئی یک سے ہوگا۔یواین آئی