پی ڈی پی کا۱۳جولائی پر بی جے پی کے ریمارکس کے خلاف احتجاج

سرینگر//
پی ڈی پی کے کارکنوں نے پارٹی لیڈر التجا مفتی کی قیادت میں جمعرات کو یہاں۱۳جولائی کے شہداء پر بی جے پی لیڈر کے ریمارکس کے خلاف احتجاج درج کیا۔
احتجاجی کارکنوں نے ہاتھوں میں پلے کارڈس اٹھا رکھے تھے اور وہ ’شہدا کے وارث زندہ ہیں‘جیسے نعرے لگا رہے تھے ۔
اس موقع پر التجا مفتی نے میڈیا کے ساتھ بات کرتے ہوئے کہا’’۷۰سال قبل ان شہیدوں نے تانا شاہی راج کے خلاف اپنی جانیں نچھاور کی ہیں یہاں لوگوں پر ظلم تھا‘‘۔
التجا نے کہا’’ہم ان شہیدوں کی توہین کو بر داشت نہیں کریں گے ان کی قربانیوں کی وجہ سے ہی یہاں ایک سیاسی تحریک شرع ہوئی اور پھر جمہوری نظام قائم ہوا‘۔
پی ڈی پی لیڈر نے کہا کہ اگر ان شہیدوں نے قربانیاں نہ دی ہوتیں تو یہاں جمہوری نظام قائم نہیں ہوتا۔انہوں نے کہا’’کل ہمارے ان شہیدوں کی توہین کی گئی جو قطعی غلط ہے بی جے پی ہماری اجتماعی تاریخ کو ختم کرنا چاہتی ہے لیکن ہم ایسا نہیں ہونے دیں گے ‘‘۔
ان کا کہنا تھا’’ہم چاہتے ہیں کہ بی جے پی لیڈر سنیل شرما جموں وکشمیر کے لوگوں سے معافی مانگیں‘‘۔انہوں نے کہا’’یہ۲۲شہید ہمارے ہیرو تھے اور رہیں گے ۔‘‘