خطاب نے ریاستی درجے کی بحالی پر یقین دہانی کی:کانگریس

جموں//
کانگریس کے سینئر لیڈر غلام احمد میر نے جموں وکشمیر اسمبلی کے بجٹ اجلاس میں لیفٹیننٹ گورنر کے خطبے پر اظہار اطمینان کرتے ہوئے کہا کہ کہ بجٹ اجلاس کے آغاز میں لیفٹیننٹ گورنر نے اپنے خطاب میں جموں وکشمیر کے ریاستی درجے کی بحالی کی یقین دہائی کی۔
میر نے کہا’’لیفٹیننٹ گورنر نے خود یہ تسلیم کیا کہ ۷برسوں کے بعد آج کا بجٹ منتخب سرکار کا بجٹ ہوگا‘‘۔
کانگریسی لیڈر نے ان باتوں کا اظہار یہاں پیر کو بجٹ اجلاس کے اختتام کے بعد نامہ نگاروں کے ساتھ بات کرنے کے دوران کیا۔
میر نے کہا’’آج بجٹ اجلاس کے آغاز پر لیفٹیننٹ گورنر منوج سنہا کے خطبے کی سب سے اچھی بات یہ تھی کہ جموں و کشمیر کے ریاستی درجے کی بحالی کی یقین دہانی کی گئی اور دوسری اچھی بات یہ تھی کہ ایل جی نے خود مانا کہ جموں وکشمیر میں سات برسوں کے بعد منتخب سرکار کا بجٹ ہوگا‘‘۔
ڈورو سے کانگریسی رکن اسمبلی کا کہنا تھا’’اس بجٹ میں لوگوں کے مشکلات کا خیال رکھا گیا ہوگا اور لوگوں کے ساتھ کئے گئے وعدوں کو پورا کرنے کی کوشش کی گئی ہوگی‘‘۔
میر نے کہا’’سات سال یہاں جمہوریت نہیں تھی یہاں بیوروکریٹ بند کمروں میں بجٹ بناتے تھے‘‘۔انہوں نے کہا’’اب جب یہاں بجٹ پیش کیا جائے گا تو اس پر بحث ہوگی جس کو لوگ بھی دیکھیں گے اور لوگوں کو در پیش مشکلات جیسے بے روزگاری، عارضی ملازموں کے مسائل، بجلی، گیس، راش وغیرہ پر بحث ہوگی۔‘‘