وقار کی جنگ میں پاکستان اور بنگلہ دیش راولپنڈی میں اتریں گے

راولپنڈی// پاکستان اور بنگلہ دیش جمعرات کو راولپنڈی کرکٹ اسٹیڈیم میں وقارکی جنگ میں آمنے سامنے ہوں گے۔ دونوں ٹیمیں پہلے ہی آئی سی سی چیمپئنز ٹرافی 2025 کے سیمی فائنل کی دوڑ سے باہر ہو چکی ہیں۔
پاکستان کی 25 سال بعد آئی سی سی ٹورنامنٹ کے میزبان کے طور پر واپسی مایوس کن رہی۔ ٹیم باضابطہ طور پر صرف پانچ دنوں کے اندر ہی باہر ہوگئی۔ ان کی مہم بلے بازی میں گراوٹ، غیر موثر گیندبازی اور ناقص فیلڈنگ کی وجہ سے متاثر ہوئی ہے۔ دوسری طرف بنگلہ دیش نے جدوجہد کی ہے۔ بولنگ اٹیک میں اچھی کارکردگی دکھانے کے باوجود بیٹنگ میں مسلسل مایوس کن کارکردگی ان کی ناکامی کی وجہ بنی ہے۔
جہاں ہندوستان اور نیوزی لینڈ نے گروپ اے سے سیمی فائنل میں اپنی جگہ پکی کرلی ہے، وہیں پاکستان اور بنگلہ دیش سرفہرست دو ٹیموں سے ہار کر ٹیبل کے سب سے نیچے ہیں۔ نتیجے کے طور پر، جمعرات کا میچ ٹورنامنٹ میں آگے بڑھنے کے بجائے فخر کو بچانے کے بارے میں ہوگا۔
راولپنڈی کی پچ بلے بازی کے موافق ہونے کی توقع ہے، موسم گرم رہ سکتا ہے۔ تاہم، شام کے وقت اوس پڑ سکتی ہے، جس سے روشنی میں گیندبازی کرنا چینلجنگ کام ہوجائے گا۔ اپنی جدوجہد کے باوجود، گھریلو فائدہ اور بہتر ٹیم گہرائی کی وجہ سے پاکستان کا پلڑا بھاری رہے گا۔ تاہم، کھونے کے لیے کچھ بھی نہ ہونے پر، بنگلہ دیش سرپرائز دینے اور اپنی مہم کو ایک اعلیٰ درجے پر ختم کرنے کی کوشش کرسکتا ہے۔
دونوں فریقوں کا مقصد جیت کے ساتھ مہم کو ختم کرنا ہے، شائقین ایک زبردست مقابلے کی توقع کر سکتے ہیں۔