نئی دہلی//وزیر دفاع راجناتھ سنگھ نے کہا ہے کہ ہندوستان ٹیکنالوجی کے میدان میں تیزی سے آگے بڑھ رہا ہے اور اگلے پانچ برسوں میں اس کے 300 سے 350 بلین ڈالر تک پہنچنے کی امید ہے ۔
مسٹر سنگھ نے آج ہماچل پردیش کے منڈی میں انڈین انسٹی ٹیوٹ آف ٹیکنالوجی کے 16 ویں یوم تاسیس سے خطاب کرتے ہوئے کہا "ہندوستان کا ٹیکنالوجی کا شعبہ بڑھ رہا ہے اور اگلے پانچ برسوں میں اس کے 300-350 بلین امریکی ڈالر تک پہنچنے کی امید ہے ۔” 1.25 لاکھ سے زیادہ اسٹارٹ اپس اور 110 یونیکورنز کے ساتھ ہمارا ملک دنیا کا تیسرا سب سے بڑا اسٹارٹ اپ ماحولیاتی نظام بن رہا ہے ۔
انہوں نے طلباء کی حوصلہ افزائی کرتے ہوئے کہا کہ وہ ترقی کے اس دور اور مواقع کا فائدہ اٹھاتے ہوئے اس بات کو یقینی بنائیں کہ وہ نہ صرف ہندوستان کی تکنیکی ترقی میں اپنا حصہ ڈالیں بلکہ تحقیق اور ترقی کے کلیدی شعبوں میں عالمی رہنما بھی بنیں۔ مسٹر سنگھ نے ٹیکنالوجی کے مستقبل کی تشکیل میں اختراعات اور علم کی تخلیق کی ضرورت پر زور دیا۔ انہوں نے انٹرپرینیورشپ اور اختراع کے کلچر کو فروغ دینے کی اہمیت کا بھی ذکر کیا۔ یہ ہندوستان کو مصنوعی ذہانت، مشین لرننگ اور ڈیجیٹل ٹیکنالوجی جیسے ابھرتے ہوئے شعبوں میں تیزی سے آگے بڑھنے کے قابل بنائے گا۔ انہوں نے ہندوستان کی تکنیکی اور سائنسی ترقی کو تشکیل دینے میں انسٹی ٹیوٹ کے شاندار تعاون کی تعریف کی۔ انہوں نے اختراعات اور تحقیق کو فروغ دینے میں آئی آئی ٹی منڈی کے اہم رول پر بھی روشنی ڈالی اور ٹیکنالوجی کے میدان میں ایک عالمی رہنما کے طور پر ہندوستان کی بڑھتی ہوئی اہمیت پر زور دیا۔
قومی سلامتی کے تناظر میں مسٹر سنگھ نے آئی آئی ٹی منڈی پر زور دیا کہ وہ دفاع سے متعلق ٹیکنالوجیز میں زیادہ اہم کردار ادا کرے ۔ انہوں نے ڈی آر ڈی او کے ساتھ موجودہ تعاون کی تعریف کی اور مصنوعی ذہانت ( اے آئی ) سے چلنے والی جنگ، مقامی اے آئی چپ ڈیولپمنٹ، سائبر سیکورٹی اور کوانٹم ٹیکنالوجی جیسے شعبوں میں مزید تعاون پر زور دیا۔
وزیر دفاع نے دفاعی شعبے میں خود انحصاری میں ہندوستان کی پیش رفت کا بھی ذکر کیا اور کہا "ہندوستان نے گولہ بارود کی پیداوار میں 88 فیصد خود کفالت حاصل کر لی ہے اور دفاعی برآمدات 2023-24 میں تقریباً 23,000 کروڑ روپے تک پہنچنے کے لیے ہم تیار ہیں۔ ہمارا مقصد 2029 تک دفاعی برآمدات کو 50,000 کروڑ روپے تک پہنچانا ہے ۔
انہوں نے ہندوستان میں ایک مضبوط دفاعی صنعت کی تعمیر میں حکومت کے عزم کا اعادہ کیا۔ انہوں نے آئی آئی ٹی منڈی کے طلباء سے کہا کہ وہ ٹیکنالوجی کے حل پر توجہ مرکوز کرتے ہوئے اس وژن میں اپنا حصہ ڈالیں۔
طلباء سے 2047 تک ملک کو ترقی یافتہ بنانے کے لیے تکنیکی اختراعات میں مہارت حاصل کرنے کی تلقین کرتے ہوئے وزیر دفاع نے انہیں پہل، اصلاحات اور تبدیلی کے اصولوں پر عمل کرنے کا مشورہ دیا۔ مسٹر سنگھ نے ان کی حوصلہ افزائی کرتے ہوئے کہا کہ وہ علم کے حصول میں ہمت سے کام لیں اور چیلنجوں کا سامنا کرتے ہوئے ثابت قدم رہیں۔
