مرکز دہشت گردی سے پاک جموں کشمیرکیلئے پرعزم

’دہشت گردی کی مالی اعانت کی نگرانی کے علاوہ نارکو ٹیرر کے معاملوں پر گرفت مضبوط کی جائے ‘
نئی دہلی//
مرکزی وزیر داخلہ ‘امیت شاہ نے جموں و کشمیر میں سلامتی کی صورتحال کا جائزہ لینے کے لیے نئی دہلی میں اعلیٰ سطحی اجلاسوں کی صدارت کی۔
یہ ملاقات۴؍اور۵فروری کو ہندوستانی فوج اور جموں و کشمیر پولیس کے ساتھ ہونے والی اعلی سطحی میٹنگوں کا تسلسل تھیں۔
مرکزی داخلہ سکریٹری، ڈائریکٹر (آئی بی)، سینٹرل ریزرو پولیس فورس (سی آر پی ایف) اور بارڈر سیکورٹی فورس (بی ایس ایف) کے ڈائریکٹر جنرل اور دیگر سینئر افسران نے ان میٹنگوں میں شرکت کی۔
مرکزی وزیر داخلہ نے کہا کہ وزیر اعظم نریندر مودی کی قیادت میں مرکزی حکومت ’دہشت گردی سے پاک جموں و کشمیر‘ کیلئے پرعزم ہے۔ انہوں نے دہشت گردی سے پاک جموں و کشمیر کے ہدف کو حاصل کرنے کیلئے نیم فوجی دستوں کے کردار پر زور دیا۔
شاہ نے بی ایس ایف کو ہدایت دی کہ وہ سخت نگرانی، سرحدی گرڈ کو مضبوط بنانے اور نگرانی اور سرحد کی حفاظت کے لئے جدید ٹکنالوجی کے استعمال کو اپناتے ہوئے بین الاقوامی سرحدوں سے صفر دراندازی کو یقینی بنائے۔
وفاقی وزیر داخلہ نے سی آر پی ایف کو ہندوستانی فوج اور جموں و کشمیر پولیس کے ساتھ ہم آہنگی جاری رکھنے کی ہدایت دی۔ انہوں نے سی آر پی ایف کے سرمائی ایکشن پلان کا جائزہ لیا اور اس بات کو یقینی بنانے کی ہدایت کی کہ علاقے کے غلبے میں کوئی خلا نہ ہو۔
شاہ نے جموں خطے پر توجہ مرکوز کرنے اور بلندیوں پر غلبہ حاصل کرنے کی ہدایت دی۔
مرکزی وزیر داخلہ نے جموں کشمیر میں کام کرنے والے انٹیلی جنس آلات کا بھی جائزہ لیا اور انہیں معیاری انٹیلی جنس پیدا کرنے کے لئے کوریج اور رسائی بڑھانے کی ہدایت دی۔ انہوں نے انٹیلی جنس کی تیاری میں ٹیکنالوجی کی اہمیت کا اعادہ کیا۔
شاہ نے مزید کہا کہ دہشت گردی کی مالی اعانت کی نگرانی، نارکو ٹیرر کے معاملوں پر گرفت مضبوط کرنا اور جموں و کشمیر میں دہشت گردی کے پورے نظام کو ختم کرنا مودی حکومت کی ترجیح ات ہیں۔ انہوں نے کہا کہ جموں و کشمیر میں زیرو ٹیرر پلان کیلئے سخت اقدامات کئے جارہے ہیں۔
مرکزی وزیر داخلہ نے ملک دشمن عناصر کے منفی پراپیگنڈے کا مقابلہ کرنے پر توجہ مرکوز کرنے کی بھی ہدایت کی تاکہ صحیح تصویر عوام کے سامنے آسکے۔ انہوں نے ایجنسیوں کے درمیان ہم آہنگی کو جاری رکھنے کی ہدایت کی اور ٹیکنالوجی کو اپنانے اور انٹیلی جنس میں اضافے کیلئے رہنمائی کی۔
شاہ نے تمام سیکورٹی ایجنسیوں کو چوکس رہنے اور جموں و کشمیر میں دہشت گردی کے خاتمے کے لئے ہم آہنگی کے ساتھ کام جاری رکھنے کی ہدایت دی۔ انہوں نے یقین دلایا کہ اس کوشش میں تمام وسائل فراہم کئے جائیں گے۔