’۱۰سال کے دوران تاریخی ریاست کو تباہ و برباد کیا گیا‘

سرینگر//
جموں کشمیر نیشنل کانفرنس کے صدر‘ ڈاکٹرفاروق عبداللہ کا کہنا ہے کہ تنظیم کی بالادستی، تنظیم میں ربط و ضبط اور تنظیمی لائحہ عمل پر کاربند رہنے سے ہی ہم کامیابی اور کامرانی کے منازل طے کرسکتے ہیں۔
ڈاکٹرفاروق نے کہاکہ لوگوں کے مسائل و مشکلات کے حل کی خاطر سرکار کوشاں ہے ۔
ان باتوں کا اظہار این سی صدر نے پارٹی ہیڈ کواٹر پر ایک اجلاس سے خطاب کے دوران کیا۔
ڈاکٹر فاروق نے کہاکہ مرحوم شیخ محمد عبداللہ زندگی کے آخری دم تک اس بات کو دہراتے رہے کہ عوام ہی طاقت کا سرچشمہ ہے اور سرداری عوام کا حق ہے۔’’ جموںوکشمیر میں جبھی ایک جمہوری حکومت معرض وجود آئی جب عوام نے نیشنل کانفرنس کو بھر پور اشتراک اور تعاون فراہم کیا ‘‘۔
این سی صدر کا کہنا تھا کہ عوام نے نیشنل کانفرنس کو صرف حکومت میں نہیں لایا بلکہ ایک باری بوجھ اور امتحان میں ڈال دیا جس پر ہمارے وزرائاور اراکین اسمبلی کو کھرا اُترنا ہوگا۔
ڈاکٹر فاروق نے کہاکہ مجھے اُمید جس طرح سے ہمارے اسمبلی ممبران خصوصاً نوجوان اراکین اسمبلی دن رات ایک کرکے لوگوں کی راحت کیلئے کام کرتے رہیںگے ۔
حکمراں جماعت کے صدرنے کہاکہ اللہ کا شکر ہے کہ ہمارے نومنتخب ممبران اسمبلی ہر وقت لوگوں میں رہتے ہیں اور ہمیشہ لوگوں کیلئے دستیاب رہتے ہیں، میں اپنے اسمبلی ممبران سے اپیل کرتا ہوں کہ وہ اسی طرح خود کو لوگوں کیلئے وقف رکھیں کیونکہ لوگوں نے اپنے قیمتی ووٹوں کے ذریعے چُنا ہے ۔ ’’ہمیں ذاتی مفادات کو بالائے طاق رکھتے ہوئے عوامی مفادات کو ترجیح دینی چاہئے ، یہی ہمارا لائحہ عمل ہونا چاہئے ‘‘۔
ڈاکٹر فاروق نے کہا’’ حکومت کی حد درجہ کوشش یہی ہے کہ عوام کو راحت پہنچائی جائے انشاء اللہ ریاستی درجہ کی بحالی کے بعد حکومت مزید موثر طریقے سے عوامی راحت کے کام کرسکتی ہے ‘‘۔
این سی صدر کے مطابق گذشتہ ۱۰سال کے دوران جموں وکشمیر کو جس تباہی اور بربادی کے دہانے پر لاکھڑا کیا گیا نیشنل کانفرنس کی حکومت اس تاریخی ریاست کی شانِ رفتہ پھر ایک بار بحال کرکے ہی دم لے گی۔ ہم نے اپنے منشور میں جو بھی وعدے کئے ہیں اُن سب کو ایک ایک کرکے پورا کیاجائے گا۔